Nunani Avannarlerni Ministerit Siunnersuisooqatigiivini suleqatigiinnermut ministerii Nuummi ataatsimiissapput

Åland-ip, Savalimmiut Kalaallillu Nunaata Nunani Avannarlerni Ministerit Siunnersuisooqatigiivini suleqatigiinnermut ministerii Nuummi ataatsimiissapput

Peqqissutsimut Nunanullu Avannarlernut Suleqateqarnermut Naalakkersuisoq Doris Jakobsen Nunat Avannarliit Katuami pingasunngornermi februarip qulingani 2016 isumasioqatigiinnerannut atatillugu suleqatiminik ataatsimeeqateqassaaq.

Nunat taakku pingasut Nunani Avannarlerni Ministerit Siunnersuisooqatigiivini 2011-miilli suleqatigiinnissamut immikkut isumaqatigiissuteqarput. 2015-mi Danmark Nunani Avannarlerni Ministerit Siunnersuisooqatigiivini siulittaasuutitaqarpoq. 2016-mi Finland-i siulittaasuutitaqarpoq matumanilu Åland aamma suleqataaniarpoq.

Savalimmiunit Inuussutissarsiornermut Nunanullu Allanut tunngasunut aammalu Nunanut Avannarlernut Suleqateqarnermut ministeri Poul Michelsen aamma Ålandimit Kansli- aamma Kommuneministeri aammalu Nunanut Avannarlernut Suleqateqarnermut ministeri Nina Fellman tikissapput.

”Ukiup aallartinnerani suleqatinnik ataatsimeeqateqarnissara assut qilanaaraara taamaalilluta immitsinnut tapersersoqatigiittarsinnaagatta Finlandimiut siulittaasuuteqarnerisa nalaani. Nunani Avannarlerni Ministerit Siunnersuisooqatigiivisa nutaamik suleriaasiat ima kinguneqassaaq, annertusiartuinnartumik politikkikkut apeqqutinik assersuutigalugu EU pillugu sammisaqarsinnaalernissarput. Susassaqarfiit nunat avannarliit isumaqatigiissutaannit atuuffigineqartut EU-mi inatsisilianit sammineqartarnerat malugisarparput.” Doris Jakobsen oqarpoq.

”Aammattaaq 2015-mi nunat avannarliit suleqatigiinnerat tamanna atorparput uparuarniarlugu EU puisit amii pillugit paasisitsiniaanera naammanngitsoq pillugu. Nunani Avannarlerni Ministerit Siunnersuisooqatigiivi KNAPK-p nunani avannarlerni arlalinni paasisitsiniaalluni ingerlataanut 500.000 kr.-nik aningaasaliissuteqarput. Kalaallit Nunaannit iluarisimaarparput suliap Nunat Avannarliit Siunnersuisooqatigiivinut qaqinniarneqarnera, taamaalilluni tassannga EU kimigiiserfigineqarsinnaalissammat, EU-p tamatumunnga naammassinnissinnaalernissaa angujumallugu, soorlu taama neriorsorsimagaatigut EU-p puisit amiinik eqqussisarneq pillugu maleruagassanik allanngortitsineranut atatillugu” Doris Jakobsen naggasiivoq.


Paasisaqarnerorusuttut attavigisinnaavaat Naalakkersuisumut allatsi Rosa Thorsen, mobilikkut: +299 55 33 03 imaluunniit e-mail: rosat@nanoq.gl