Imminut paarigit – usuup puua atoruk

Atoqatigiinneq peqqissoq ingerlanneqalerpat suliami “Imminut paarigit – usuup puua atoruk”- qulequtarineqassaaq nuna tamakkerlugu saqqummersinneqarpat aamma Facebooki aqqutigalugu. Oqariartuut ersarippoq: Atoqatigiinneq nuannerpoq usuup puualu atorukku kinguaassiutitigut nappaatinut kissaataanngitsumillu naatulernissamut illersorneqassaatit.

Suliaq immikkut ittuuvoq nammineq piumassutsimikkut suliaqatigiit SexInuk aammalu Nunatsinni Nakorsaaneqarfik Peqqissutsimullu Naalakkersuisoqarfik suleqatigiillutik suliaqarsimammata, atoqatigiinneq peqqissoq pillugu.

-”Assorsuaq SexInuk-mmik suleqateqarneq nuannaarutigaara, tassanimi pingaarnertut ingerlatsisuummata peqqissaanermut ilinniartut ilinniartitsillutik inuusuttunillu siunnersuillutik atoqatigiinnermik peqqissumik. Isumaqarpunga pingaartorujussuusoq inuusuttut namminneq oqariartortuugunik usuup puua eqqaamasaqqullugu. Uagut angajoqqaajusugut suliaq tapersersorsinnaavarput inuusuttortatsinnik ammasumik oqaloqatiginnittarutta qanoq imminut illersornissami usuup puua pingaartigisoq,” oqarpoq Peqqissutsimut Naalakkersuisoq, Doris Jakobsen, nangillunilu:

- ”Immikkut ittumik iliuuseqarnerup tunuliaqutaraa ajoraluartumik inuusuttut akornanni kinguaassiutitigut nappaatit tuniluunnerisa amerleriarujussuarsimaneri aammalu inuusuttut akornanni HIV tuniluutilersimammat. Suliniutikkut ugguuna ersersikkusupparput atoqatigiinneq peqqinnartoq siunertaralugu inuusuttut amerlanerit usuup puua atorlugu imminnut illersoqqullugit”

-”Nunatta Nakorsaaneqarfianik Peqqissutsimullu Naalakkersuisoqarfimmik suleqate-qarnerup periarfissippaatigut amerlanerpassuarnut oqariartorsinnaanermik qanoq pingaartigisoq pissusissamisoortiginersorlu usuup puuanik imminut illersornissaq. Sunniuteqarusuppugut inuusuttoqatinik ikiuinikkut atoqateqaraangamik imminut paarinissamut . Tamanna anguneqarsinnaavoq inuusuttut usuup puuinik tigoriaannarnik pissaqartinnerisigut, soorlu assersuutigalugu inuusuttut illoqarfimmiikkunik” oqarpoq Lisa Ivalu Lind SexInuk-miit.

Tamannaluuna tunuliaqutigalugu taxanut ilaasut Nuummi Sisimiuni Ilulissanilu suliniuteqarnikkut usuup puuinik tunineqarsinnaalissasut.

Illoqarfimmi bussini nittarsaassisoqassaaq aammalu allagartarsuarnik naqitaaqqanik t-shirtinik usuup puuinillu kommunini pitsaaliuinermik sulisunut peqqinnissaqarfim-mullu nassiussisoqarsimavoq atortussat sumiiffinni siammarterluarniassammata. SexInuk tv-kkut takusassianik sanatitsisimavoq usuup puua eqqaamasaqqullugu, taannalu upernaaq manna aallakaatinneqartassaaq.

Suliaq pitsaasoq annertuumik tapersersorluarneqarpoq, tamannalu takuneqarsinnaalluni tunisassiortut arlallit akikilliliisimammata atortussanik sananermi. Sisimiuni Ilulissanilu taxatartut suliaq tapersersorpaat SexInuk atortussaataalu akeqanngitsumik ingerlallugit.

Tamanna pillugu unammisitsinermullu ilaasinnaavutit atoqatigiinnermik peqqinnartumut SexInuk-p Facebookianut iserluni: facebook.com/sexinukgl

Paasissutissanik amerlanernik piniaraanni naalakkersuisup allattaa Rosa Thorsen mobilikkut: +299 55 33 03 imaluunniit e-mail: rosat@nanoq.gl aqqutigalugu pissarsiaqarsinnaavutit aamma Tupaarnaq Evaldsen SexInuk-mit mobiliagut: +299 28 56 27 e-mail: sexinukgl@gmail.com