Nunatsinni suliffeqarnikkut aaqqissuussinerup nutarterneqarnera

Stemningsbillede af Indlandsisen

Kalaallit Nunaat ukiuni makkunani allanngoriartornerup aqqutaaniippoq: Qanga suliffissat amerlasuut piniarnermi aalisarnermilu nassaassaapput, aammalu pisortat suliffeqarfiutaanni, maannali siunissami aggersumi ornippagut suliffissat amerlasuut nammminersortut inuussutissarsiutaanni, takornariartitsinermi nunamilu inuussutissarsiutini, kiisalu piffissami ungasinerusumi aatsitassarsiornermi suliffissat nutaat. Aamma utoqqaat sullineqarneranni, isumaginninnermilu sullissivinni siunissami piginnaannngorsarluarsimasunik sulisussanik pisariaqartitsisoqaleriartussaaq.

Taamaattumik Naalakkersuisut ukiuni kingullerni pimoorullugu suliniutigisimavaat inuussutissarsiornermi suliffeqarnermilu killiliussat nutartserneqarlutillu pitsaanerulersinneqarnissaat.

Kalaallit Nunaatalu ineriartornermi aggersumi iluanaarutissanik pissarsisinnaaneranut piumasaqaataavoq qularnaarneqassasoq suliffissani nutaani aggersuni sapinngisamik atorfiit amerlanerpaat uagut nammineq sulisinnaasortatsinnit inuttalerneqarsinnaalernissaat.

Nunatsinni suliffeqarnerup nutartserneqarnera aallartilluareerpoq, ukioq mannalu 2016-imi suli aammalu aaqqissuusseqqinneq sukkatsisarneqassalluni, taamaattumillu pingaaruteqarpoq suliffeqarnermi aaqqissuusseqqinnermi periusissiaq "Suliffeqarneq toqqissisimanartoq"-mi suliniutit piviusunngortinneqarnissaat.

Suliffeqarnermi periusissiami Suliffissanut, ilitsersuinernut pikkorissaqqinnernullu qitiusumik ingerlatsiviit illoqarfinni tamani pilersinneqartussat pingaarnertut inissisimassapput.

Qitiusumik ingerlatsivissani nutaani ilinniartitaanernut aamma suliffeqarnermut tunngasumik ilisimasat ataatsimut katsersorneqassapput, taamaasillunilu suliffissarsiortoq pitsaanerusumik siunnerfilersugaanerusumillu suliffissarsiornermini ikiorserneqarsinnaalersillugu.

Nukiit innuttaasut ilitsersorneqarnissaannut atorneqartussat kommuniniittut pitsaanerusumik iluaqutigineqassapput, pisariaqanngitsumillu marloqiusamik allaffissorneq pinngitsoorneqassalluni. Taamaattumik Suliffissarsiuussisarfiit aamma Piareersarfiit ataatsimoortinneqassapput. Suleriaatsit suliallu ingerlaartarneri perrassarneqassapput assigiissaarneqassallutillu, innuttaasut nunami tamarmi assigiimmik sullinneqarsinnaaqqullugit.

Suliffissaaleqisut aamma inuusuttuaqqat suli suliffeqarnikuunngitsut, imaluunniit ilinniakkamik aallartitsisimanngitsut qitiusumik ingerlatsivimmi ikiorneqarsinnaassapput pilersaarusiornissaminnut, qanoq iliorlutik suliffeqalissanerlutik imaluunniit ilinniakkamik aallartitsissanerlutik.

Qitiusumik ingerlatsiviit siunnertaraat suliffeqarnermi ingerlatsinerup sullinnissaa aammalu piginnaassanik katsersisoqartarnissaa, inuusuttuaqqat ikiorsersinnaajumallugit suliffissamik ilinniakkamilluunniit aallartitsinissaannut. Kiisalu aamma qitiusumik ingerlatsiviit suliffissaaleqisut allat aamma ikiortassavaat piginnaanngorsarnissamut aqqutissaanni piginnaasanillu ineriartortitsineranni, suliffeqalernissamik siunertaqartumik.

Tamatumunnga atatillugu ulluni 5. -7. februar Kangerlussuarmi aallarnisaataasumik seminareqartitsisoqarpoq, Inuussutissarsiornermut, Suliffeqarnermut Niuernermullu Naalakkersuisoqarfiup kommunillu suliniutinik piviusunngortinneqartussanik aallartitsivigisaannik. Seminareqarnermi aaqqissuussaanissamut nutaamut pilersaarummik aammalu piginnaasat atorfissaqartinneqartut qitiusumillu ingerlatsivinni sulianik ingerlatsinissamut tunngavissat saqqummiussorneqarput.

Seminareqartitsinerup ulluani siullermi Inuussutissarsiornermut, Suliffeqarnermut, Niuernermut Nunanullu Allanut Naalakkersuisup Vittus Qujaukitsoq-ip kommunini suliffeqarnermi isumaginninnermilu ataatsimiititaliat siulittaasui siulittaasullu tullii suliassaqarfimmi pilersaarutit pillugit ilisimatitsissuteqarfigai. Tamatuma kingornagut ulluni tulliuttuni marlunni kommunini suliassaqarfinni sulisuusut piumassuseqarlutik aallussipput kommunini suliffissanut, iliutsersuisarnernut pikkorissaqqinnernullu qitiusumik ingerlatsivissat tigussaasumik ilusissaannut aqunneqarnissaannullu siunnersuusiorlutik.

Seminareqarnermi suleqatigiinni sullinnerni aallunneqarput makkua: 1) Qitiusumik ingerlatsiviit nutaat aaqqissuussaanissaat, 2) isumaginnittoqarfimmut aamma meeqqat atuarfiannut tunngatillugu suleqatigiiffissamik pilersitsinissaq, 3) sulisuusut immikkut ilinniagallit piginnaasaat suliassaallu aamma qitiusumik ingerlatsivinni suliassat, 4) nutaamik annertunerusumillu aqutsinikkut qitiusumik ingerlartsivinni suliassaq, kiisalu suleriaasissatut ineriartortinneqarsimasut sakkussallu kommunini sulianik ingerlatsinermi innuttaasunillu sullissivimmi suliassat nukittorsarneqarnissaat.

Pilersaarut tassaavoq aaqqissuussaanikkut killiliussassat allaaserineqarlutillu uppernarsaasersorneqarsimanissaat 2016-ip qiteqqunnerani, tamakkiisumillu atortuulersinneqarsimassallutik 1. januar 2017.

Ersarinnerusunik paasissutissanik atorfissaqartitsigaanni attavigineqassaaq Pisortaaneq Jørn Skov Nielsen oqarasuaammi 556188 imaluunniit jsn@nanoq.gl