Naalakkersuisut kommunit isumaginninnikkut oqartussaaffianik arsaarusunngilaat

Borgmester Asii Chemnitz Narup, Kommuneqarfik Sermersooq, Sermitsiaq 3. februar 2016-meersoq aqqutigalugu oqariartuuteqarpoq, Naalakkersuisut isumaginninnerup aqunneqarneranut ingerlanneqarneranullu nutaamik siunnersuuteqarnermikkut kommunit nammineersinnaassusaat annertuumik innarlerniaraat. Inatsisissatut siunnersuut aqqutigalugu Naalakkersuisut pisinnaatitaaffilerneqarusupput kommunip isumaginninnikkut ingerlatsineranik tamakkiisumik ilaannakortormilluunniit tigusinnaanissaminnut. Tamatumanili apeqqutaassasoq nakkutilliinerup takutissimagaa kommunip assersuutigalugu meeqqanut inuusuttuaqqanullu inatsisitigut pisussaaffigisani kivissinnaasimanngikkai.

Inatsisissatut siunnersuutip suliarineqarneranut pissutaavoq, nakkutilliiartornerit malitsigisaannik nalunaarusiatigut takuneqarsinnaasarsimammat illoqarfinni nunaqarfinnilu ikigisassaanngeqisuni meeqqat inuusuttuaqqallu atugaqartinneqartut. Ilaatigut nakkutilliiartortut siumoortarsimavaat meeqqat inuusuttuaqqallu annertuumik atornerlunneqarlutillu sumiginnarneqarsimasaraangata, piffissaagallartillugu qanoq iliuuseqartoqartarsimanngitsoq. Meeqqanut Illersuisup Qaasuitsup Kommuniani angalareerluni nalunaarusiamini meeqqat atugarisamikkut annertuumik sumiginnarneqartarsimasut, taamaattumillu Naalakkersuisut pisariaqartillugu nalilersimagaat akulerunnissamut pisinnaatitaaffitik annertusaavigineqartariaqartut.

Tamatumanili naqissusiivigineqassaaq, Naalakkersuisut ataasinnguamilluunniit kissaatiginngimmassuk kommunit isumaginninnikkut oqartussaaffiinik arsaarniarnissaat. Naalakkersuisummi kissaatigivaat, isumaginninnikkut iliuuseqaataasartut sapinngisamik innutaasut qanimut suleqatigalugit ingerlanneqartariaqartut. Taamaakkaluartorli aamma periarfissaqarfigiumallugu, kommunip pisussaaffini annertuumik sumiginnarsimassappagit akulerussinnaanissamut periarfissaqarnissaq. Taamak isumaqarpoq Isumaginninnermut Naalakkersuisoq Martha Lund Olsen.

”Meeqqat qitiutillugit sullissisoqartussaavoq meeqqanik inuusuttuaqqanillu suliniuteqartarnerni. Ajoraluartumilli nakkutilliiartortitsisarnitsinni maluginiartarsimavarput, meeqqat amerlasoorpassuit marloriaammik sumiginnarneqartartut, tamatumani kommunip pisussaaffini naapertorlugu qanoq iliuuseqarsimanngikkaangami. Tamannali inooqatigisinnaanngilarput, taamaattumillu akulerunnissamut periarfissaqartinneqartariaqarluta”, taamak Martha Lund Olsen-i oqarpoq.

Asii Chemnitz-ip ernumassutigivaa, Naalakkersuisut inatsit nutaaq aqqutigalugu kommunit siumut missingersuusiortarnerannut akulerunniarsarinerarlugit. Tamatumunngali Martha Lund Olsen-i siunertaqannginnerarpoq.

”Akuleruttoqassapat soorunalimi kommunit aningaasatigut namminneq aqutsisinnaanerat aammalu suleqatiginnikkusussuseqarneq atorlugu akuleruttoqassaaq. Kommunit isumaginninnikkut oqartussaaffiinik arsaarinniffigitikkusunngilakka. Taamaattumiuna qitiusumik nakkutilliisoqarfimmik pilersitsisoqarnissaa siunertaralugu suliniuteqarsimasunga. Tassanngaanniit kommunit suleqatigineqartassapput, kommunit oqartussaaffiat innarlinngikkaluarlugu. Akerlianilli isiginngitsuusaaginnarsinnaanngilara, kommuni arlaleriangaatsiarluni meerartarisaminik sumiginnaasimasartillugu. Taamaattumik nuannaarutigaara Meeqqat Illersuisuata inatsisissamik siunnersuuteqarnerput ilalersimammagu”, Martha Lund Olsen-i naggasiivoq.

Inatsisartut Isumaginninnerup aqunneqarneranik aaqqissuussaaneranillu peqqussutaanik Inatsisissatut allannguutissaanik siunnersuutigineqartoq ugguuna qimerluuataarneqarsinnaavoq.

Paasissutissat sukumiinerusut pillugit attaveqarfigineqarsinnaavoq: Naalakkersuisup allattaa Hanne Nielsen, Tlf. +299 53 93 71, e-mail: hani@nanoq.gl