Katuami nunat avannarliit isumasioqatigiinnissaat

Nuuk illut Februarip qulinganni Naalakkersuisut ukiumoortumik Nunat avannarliit isumasioqatigiinnerat ingerlatissavaat, tassani politikerit, kattuffinneersut atorfilittallu ukioq manna Nunat Avannarliit suleqatigiinnerannik ilisimatinneqassapput.

2016-mi Danmark Nunat Avannarliit Siunnersuisooqatigiivini sulinermi siuttuussaaq, Nunallu Avannarliit Siunnersuisooqatigiivisa præsidentiat Henrik Dam Kristensen (MF) kalaallit Nunat Avannarliit Siunnersuisooqatigiivinut aallartitaasa siulittaasuannit Ineqi Kielsen-imit aammalu Nunanut Avannarlernut Suleqateqarnermut Naalakkersuisumit Doris Jakobsen-imit qaaqquneqarnikuuvoq, taamaalilluni peqataasut tamarmik ukiup aallartinneraniit ilisimatinneqarniassammata Nunat Avannarliit Siunnersuisooqatigiivini sulinermi siulittaasoqarfiup pingaartitai pillugit

Ålandip, Savalimmiut Kalaallillu Nunaata akornanni suleqatigiinnerup nakussassarnissaa siunertaralugu Nunanut Avannarlernut Suleqateqarnermut Naalakkersuisup Doris Jakobsen-ip Savalimmiuni Ålandimilu suleqatini isumasioqatigiinnermi peqataaqqullugit qaaqqu-simavai. Inuussutissarsiornermut, Nunanut Allanut tunngasunut aammalu Nunanut Avannarlernut Suleqateqarnermut ministeri Savalimmiuneersoq Poul Michelsen aamma Kansli- aamma kommuneminister aammalu Nunanut Avannarlernut Suleqateqarnermut ministeri Ålandimeersoq Nina Fellmann saqqummiussissapput nunani avannarlerni 2016-mi suleqatigiinnermut pingaartitatik pillugit.

Isumasioqatigiinnerup immikkoortuata aappaani Nunani Avannarlerni killeqarfinni akimmisaarutit amerlassusaannik ikilisaaniarneq pillugu nunat avannarliit suleqatigiinnerat sammineqassaaq, tassanilu peqataasut nunanit namminersorlutik aqunneqartunit pingasunit sulinermit tamatuminnga misilittakkanik saqqummiiffigineqassapput, tassani nunat taakku 2015-mi Killeqarfinni akimmisaarutit pillugit Siunnersuisooqatigiinni sinniisuutitaat saqqummiussissammata.

Immikkoortumi tassani Kalaallit Nunaanni Hallo Norden, ukiarmi NAPA-mi aallartittoq, aallartinnertik pillugu, aammalu ukiuni tulliuttuni suleriaaseriniakkatik pillugit saqqummiussissapput. Matumani siunertaavoq paasissutissiisarnerup annertusaavigineqarnissaa, angerlarsimaffimmiit suliffimmullu utertarlutik angalasartunut, aammalu inuit nunamut avannarlermut suliartorpat, ilinniariartorpat imaluunniit soraarninngorlutik nuuttumut malittarisassat suut atuunnersut pillugit.

Annertunerusumik paasissutissat Seniorrådgiver Jørgen S. Søndergaard jss@ghsdk.dk mobil +45 40 34 31 23