Qitiusumik ingerlatsiviit pillugit seminareqartitsineq

Suliffissanut, Ilitsersuisarnernut Pikkorissaaqqittarnernullu qitiusumik ingerlatsiviit pillugit seminareqartitsineq

Inuussutissarsiornermut, Suliffeqarnermut, Niuernermut Nunanullu allanut Naalakkersuisoq Vittus Qujaukitsoq Kommuneni inuussutissarsiornermut Suliffeqarnermullu Ataatsimiititaliani siulittaasunut/siulittaasut tulliinut, suliffissarsiuussisarfinni sulisunut Piareersarfinnilu sulisunut Namminersorlutillu Oqartussani Atorfilittanut Kangerlussuarmi Suliffissanut, Ilitsersuisarnernut Pikkorissaaqqittarnernullu qitiusumik ingerlatsiviit pillugit ulluni feb. 5.-7. 2016 seminareqartitsissaaq.

Suliffissanut, Ilitsersuisarnernut Pikkorissaaqqittarnernullu qitiusumik ingerlatsiviit pillugit inatsit 1.januar 2016 aallarnerfigalugu atuutilerpoq, tassanilu Kommuneni suliffissarsiuussisarnermi suliniutit eqaatsumik assigiiaartumillu ingerlanneqartalernissaat anguniarneqarpoq. Inatsit Naalakkersuisut suliffissaqartitsiniarlutik periusissiaanni ”Suliffeqarneq toqqissisimanartoq 2015”-imi qitiutinneqarpoq pingaarutilik.

Aallarnisaalluni seminareqartitsinermi peqataasut suliffissanut, Ilitsersuisarnernut Pikkorissaaqqittarnernullu qitiusumik ingerlatsiviit pillugit inatsit nutaaq pillugu saqqummiivigineqassapput, inatsisip malitsigisaanik Piareersarfiit suliffissarsiuussisarfiillu ataatsimoortinneqalissapput. Taamaattumillu siunnersortit sulisullu attuumassuteqartut suleriaatsinik nutaanik paasitinneqassapput, aaqqissuussaaneq aamma siunissami pisussanik kiisalu qitiusumik ingerlatsiviit suliassaat piginnaasassaallu pillugit saqqummiivigineqassallutik.

”Suliffissanut, ilitsersuinernut pikkorissaqqinnernullu qitiusumik ingerlatsiviit nutaat sullerinnerullutillu suleriallaqqinnerusussat maannamiit sukkanerungaartumik innuttaasunik kiffartuussisassapput, siunnerfilimmik naammassisaqarfiusinnaasumillu iliuusissatut pilersaarutitalimmik, tassuunalu innuttaasoq sukkanerusumik suliffeqarnermut ingerlatissinnaassallugu, imaluunniit pikkorissaqqinnermik aallartitsisissinnaallugu”, Inuussutissarsiornermut, Suliffeqarnermut, Niuernermut Nunanullu allanut Naalakkersuisoq Vittus Qujaukitsoq oqarpoq.

Kommunet piffissami aggersumi Suliffissanut, ilitsersuisarnernut pikkorissaqqinnernullu qitiusumik ingerlatsivinnik nutaanik piareersaanissanut annertuunik suliassaqarput. Seminareqartitsinermi Naalakkersuisunit aaqqissuussaanermik siunnersuummik saqqummiussissapput, taannalu oqaloqatigiinnissamut aallaaviussaaq. Ukioq manna - 2016,- atortuulersitsiartuaarfissatut isigineqarpoq, kisianni 1. januar 2017 qitiusumik ingerlatsiviit tamakkiisumik ingerlalernissaat naatsorsuutigineqarpoq.

Pilersaarut aallarnisaallunilu seminareqarnermi saqqummiussat quppernermi matumani takuneqarsinnaapput

Annertunerusumik paasisaqarusukkaanni attavissaq: Inuussutissarsiornermut, Suliffeqarnermut Niuernermullu Naalakkersuisoqarfimmi pisortaq Jørn Skov Nielsen +299 55 61 88