Ironbark pillugu innuttaasunik ataatsimiititsinerit naammassilluartut

Ironbark Zinc Ltd.-ip Nunatta avannaata kangiani Citronen Fjordimi aqerlumik zinkimillu aatsitassarsiulernissamut qinnuteqaataa pillugu innuttaasunik ataatsimiititsisarnerit Qaqortumi innuttaasunik sisamanngornermi 4. februaari 2016 ataatsimiititsinermik naggaserneqarput. Kommunit sisamat tamarmik tikinneqarsimalerput innttaasut apeqqutaat oqaaseqaataallu tusarniarlugit.

Aningaasaqarnermut Aatsitassanullu Naalakkersuisoq Randi Vestergaard Evaldsen aamma Pinngortitamut, Avatangiisinut Inatsisinillu Atuutsitsinermut Naalakkersuisoq Mala Høy Kúko Naalakkersuisut sinnerlugit pqatapput:
”Innuttaasut tusarniarlugit kommunit sisamat tamaasa tikinneqarnissaat Naalakkersuisut pingaartissimavaat. Suliniut pillugu soqutiginnilluartoqarlunilu pimoorussilluartoqarsimavoq.

Suliniut Nunatta aningaasaqaneranut suliffissaqartitsineranullu tapertaalluarsinnaavoq. IBA-mik isuqatiginninniarnissat qilanaarivagut, nunatsinnit suliffissat tunisinissallu sapinngisamik annertunerpaajutinnissaat qulakkeerniassallutigu”, taama oqarput Aningaasaqarnermut Aatsitassanullu Naalakkersuisoq Randi Vestergaard Evaldsen aamma Pinngortitamut, Avatangiisinut Inatsisinillu Atuutsitsinermut Naalakkersuisoq Mala Høy Kúko.
Piiaaffissamik suliniut suliffinnik 470-it missaannik pilersitsisinnaavoq Nunatsinnilu suliffeqarfiit tunisinissamut periarfissaqassallutik. Piiaaffiup ingerlanerani tamanna akileraarutitigut Nunatsinnut 4-5 mia. koruunit akornannik isertitsissutaasinnaanera ilimagineqarpoq.

Naalakkersuisut suliniut pillugu aalajangiinialerpata pingaartissavaat tamanna avatangiisinut illersorneqarsinnaasumik inerlanneqarsinnaassanersoq. Avatangiisilli pillugit inaarutaasumik aalajangiinnginnermi tusarniaanermut akissutit oqaaseqaatillu, minnerunngitsumillu ilisimatuussutsikkut ilisimasallit arlaannulluunniit attuumassuteqanngitsut DCE-meersut Pinngortitaleriffimmeersullu aatsaat ilanngunneqareerpata aalajangertoqarumaarpoq.

Paasisaqarnerorusuttut attavigisinnaavaat Aatsitassanik Suliassaqarfinnut Avatangiisinut Aqutsisoqarfimmi piosrtaq Jesper Bistrup, oqarasuaat +299 56 06 60, imaluunniit e-mail jebl@nanoq.gl.