Nunani avannarlerni suleqatigiit ataatsimiittut

Nunani avannarlerni suleqatigiinnermut ministerit februarip pingajuanni Helsingfors-imi ataatsimiipput, tamanna Finland-ip Nunani Avannarlerni Ministerit Siunnersuisooqatigiivini siulittaasuutitaqarneranni siullermeerutaasumik ataatsimiinnerup.

Nunanut Avannarlernut Suleqateqanermut Naalakkersuisoq Doris Jakobsen ataatsimiinnermi peqataavoq.

Ministerit aalajangerpaat missingersuusiassaq 2017-mut tunngassuteqartoq suliarineqartussaq 2016-misut annertussuseqassasoq, tassa imaappoq Nunani Avannarlerni Ministerit Siunnersui-sooqatigiivi aamma 2017-mi atugassaqassapput missingersuutinik katillugit 927,546 mio. kr.-nik annertussuseqartunik.

Suleqatigiinnermut ministerinit pingaartinneqarpoq 2016-mi killeqarfinni akimmisaarutinik nungusaanerup ingerlatiinnarnissaa, aammalu Europa-mi qimaasut pillugit aaqqiiniarneq pillugu oqaloqatigiinnerup annertusarnissaa. Ministerit aalajangerpaat ukioq manna kingusinnerusukkut qimaasut nunasisullu inuiaqatigiinnut ilanngutitinneqartarnerat pillugu suleqatigiinneq pillugu nunat avannarliit ataatsimeersuartitsissasut.

Ministerit siunnersuisooqatigiivisa issittumi ataatsimoorussamik periusissiaannut pimoorussinertik ministerit naqissuserpaat, generalsekretærilu suliassillugu issittumi inuussutissarsiutit ineriartortinneqarnerannut attaveqaatitigullu suleqatigiinnermut naalakkersuinikkut suliniutissat ersarissaqqul-lugit aammalu Issittumi Siunnersuisooqatigiit silasiorneq pillugu suliniutaat tapersersorneqarluni.

”Ministerit Siunnersuisooqatigiivisa aamma nunap inoqqaavisa Issittumi Siunnersuisooqatigiinni sulinerannut tapersersuinertik ingerlatiinnarniarpaat, Naalakkersuisullu tungaannit pingaarteqaarput tamatuma ministerit siunnersuisooqatigiivisa naalakkersuinikkut Issittoq pillugu 2016-mi suliniutaannut ilaatinneqarnissaa”, Nunanut Avannarlernut Suleqateqarnermut Naalakkersuisoq Doris Jakobsen oqaaseqarpoq.

”Ukioq mannamut Finlandimiut siulittaasuutitaqarnerannut pilersaarummi aamma imeq, pinngortitaq inuillu pillugit soqutiginaatilinnik arlalinnik suliniuteqartoqarpoq, aammalu suleqatinnik Savalimmiuneersumik Ålandimeersumillu pitsaasumik oqaloqateqarlunga. Uannut pingaaruteqarpoq nunat pingasut taakku namminersorlutik aqunneqartut nunani avannarlerni suleqatigiinnermi qanimut suleqatigiinnissaat, taamaalilluta sulinermi tamatumani tapersersoqatigiittarsinnaagatta. Oqaloqatigiinnerit tamakkua ingerlateqqissavavut Naalakkersuisut Katuami sapaatip akunnerata tulliani Nunanik avannarlernik isumasioqatigiissitsinissaannut atatillugu”. Doris Jakobsen naggasiivoq.

Paasisaqarnerorusuttut attavigisinnaavaat Naalakkersuisumut allatsi Rosa Thorsen, +299 55 33 03, email: rosat@nanoq.gl