Danmarkimut isumassarsioriartortut

Ilaqutariinnermut, Naligiissitaanermut Isumaginninnermullu Naalakkersuisup Martha Lund Olsen-ip kommunini sisamaasuni isumaginninnermut ataatsimiititaliat, taakkua pisortaatitai aammalu KANUKOKA, sapaatip akunnerani ataatsimi Danmarkimi isumassarsiorfittut paasisassarsiorluni angalaqatigiinnissamut qaaqquai.

Siunertaavoq kommunini sisamaasuni taakkunani isumaginninnermut ataatsimiititaliat oqaloqatigineqarnerannut ilaatillugu isumassarsiorfittut, sullissivinnut aammalu kommunini ingerlatsivinnut, takusaanissaq.

Angalaqatigiit ilaatigut Herning-ip kommunianukassapput, tassani taakkua ”Sverigemi-ilusiliineq” aallaavigalugu suliassanik suliarinninnermi suleriaasii nutaat annertoorujussuarmik iluarineqarsimallutik. Tamatuma saniatigut angalaqatigiit Danmarkimi sumiiffiit assigiinngitsut, utoqqarnut aamma innarluutilinnut suliassaqarfimmi suleriaatsit atortullu nutaat atorlugit suliaqarfiusut, takusassavaat.

Sapaammi januaarip 31-ani isumaginnittoqarfiup aqunneqarnera aaqqissuussaaneralu pillugu Inatsisartut peqqussutaata allannguuteqartinneqarnissaa pillugu Inatsisartut inatsisissaannut siunnersuummut tunngatillugu paasissutissiilluni ataatsimeeqatigiinnermik, angalaqatigiit isumassarsiorluni angalanerat aallarnerneqarpoq. Politikerit saqqummeereernerup kingorna itisiliisussanik apeqquteqarsinnaasimapput, tamatumalu kingorna Ilaqutariinnermut, Naligiissitaanermut Isumaginninnermullu Naalakkersuisoq peqataatinnagu, tamanna iluminni oqaloqatigiissutigalugu.

Ataasinngornerup unnukkuani Odense-mi Nordatlantisk hus-imi nal. 19.00 kaffisoqatigiinnermi kalaallit angalaqatigiinnik naapitsinissamut periarfissinneqarput, tassani Rasmus Lyberth aliikkusersuissalluni. Kikkut tamarmik tikilluaqqusaapput.

 

Paasisaqarnerorusuttut attavigisinnaavaat Naalakkersuisumut allatsi Hanne Nielsen, mobil +299 539371 imaluunniit e-mail hani@nanoq.gl.