Tuttuttassiissutit umimmattassiissutillu

Ukiuunerani 2016-mi piffissaliussat piniarfiusussat tuttutassiissutit umimmattassiissutillu.

Matumuuna ukiuunerani 2016-imi piffissaliussat piniarfiusussat, tuttutassiissutit kiisalu umimmattassiissutit APNN-imiit nalunaarutigineqarput.

Tuttut
1. Piniarfik 1 (Naternaq), Piniarfik 2 (Sisimiut- Kangerlussuaq), Piniarfik 4 (Ameralik), Piniarfik 5 (Qeqertarsuatsiaat), Piniarfik 6 (Qassit) kiisalu Piniarfik 7 (Neria): Inuussutissarsiutigalugu piniartut piniarfinni pineqartuni piffissami 18. februaarimiit 10. martsi ilanngullugu ukiuunerani tuttunniarnissamut 100-nik tuttutassinneqarsimapput.
2. Piniarfik 8 (Nuussuaq): Inuussutissarsiutigalugu piniartut Piniarfik 8-mi piffissami 18. februaarimiit 10. martsi ilanngullugu ukiuunerani tuttunniarnissamut 150-inik tuttutassinneqarsimapput.
3. Piniarfik 9 aamma 10 (Kangerluarsorujuk, Nuna Prudhoe kiisalu Nuna Inglefield): Allannguutaasinnaasut ukiukkullu piffissami nunaminertamilu killilikkami tuttunniarneq piniartut kommunillu akornanni eqqartorneqarsinnaapput.

Tunngavilersuutit: Piniarfimmi 1-imi, Piniarfik 2-mi, Piniarfik 4-mi, Piniarfik 5-imi, Piniarfik 6-imi, Piniarfik 7-mi kiisalu Piniarfik 8-mi inuussutissarsiutigalugu piniartut ukiuunerani killilimmik tuttutassinneqarsimapput. Biologinit inassutigineqaraluarpoq Piniarfik 8-mi taamaallaat ukiuunerani tuttunniarniartoqassasoq.

Umimmaat
4. Aqutsiveqarfik Maniitsoq: Piniarfik 3-mi ukiuunerani 2016-mi inuussutissarsiutigalugu umimmanniarneq 10. januaarimi aallartissaaq 10. martsi ilanngullugu ingerlassalluni. Inuussutissarsiutigalugu piniartut ataasiakkaat 45-nik umimmattassinneqarput. Piffissaliussami tassani ukiuunerani sunngiffimmi umimmanniarneq Piniarfik 1-mi periarfissaassaaq.
5. Ittoqqortoormiit: Ukiuunerani inuussutissarsiutigalugu sunngiffimmilu umimman-niarneq martsi naallugu ingerlassaaq.
6. Ivittuut umimmaqarfiani: Ukiuunerani inuussutissarsiutigalugu umimmanniarneq martsi naallugu ingerlassaaq angutivissanillu imaluunniit arnavissanik amerlavallaanik pisaqartoqartarnera pillugu ajornartorsiutip aaqqinnissaanut immikkut suiaassusilikkanik umimmanniarneq ingerlateqqinneqassaaq.

Tunngavilersuutit: Kangerlussuup eqqaani Piniarfik 2-mi inuussutissarsiutigalugu sunngiffimmilu umimmanniarneq matoqqatinneqarallarpoq pissutigalugu umimmaat piniarfimmut pineqartumut uteqqinnissaat anguniarneqarmat.

Erseqqissaatigineqarpoq qamuteralaat, ATV-t kiisalu qamutit motoorinik ingerlatillit allat tuttunik umimmannillu malersuinermi piniutigissallugilluunniit inerteqqutaammat. Qamuteralaat, ATV-t kiisalu qulimiguullit atorlugit umimmannik ungoorinissaq APNN-imut qinnutigineqarsinnaavoq.


Paasissutissat sukumiinerusut uunga saaffiginninnikkut pissarsiarineqarsinnaapput:

Immikkoortortaqarfimmi pisortaq Amalie Jessen amalie@nanoq.gl Tlf. 55 33 42

Ilanngussaq