Jakobsen Sammisaqarluni ataatsimeersuarnermi

Doris Jakobsen 2016-imi Nunat Avannarliit Killiit Siunnersuisooqatigiivini Sammisaqarluni ataatsimeersuarnermi peqataavoq

Peqqissutsimut Nunanullu Avannarlerni Suleqatigiinnermut Naalakkersuisoq Doris Jakobsen, ulluni 30.-31. januar 2016 Islandimi Grindavík-imi Nunani Avannarlerni Killerni Siunnersuisooqatigiit Sammisaqarluni ataatsimeersuarneranni ”Nunani Avannarlerni Killerni Oqartussaaqatigiinneq”, peqataavoq. 

Doris Jakobsen suliassaqarfinni assigiinngitsuni suleqatigiinnissamut nunat periarfissaat pillugit saqqummiivoq. 

- Niueqatigiinnerput aamma aningaasaqarnikkut suleqatigiinnerput nukittorsarneqassaaq. Niueqatigiinnerusariaqarpugut, aammalu inuussutissarsiornermut suliassaqarfiup iluani suli aalajangersimanerusumik suleqatigiittariaqarluta, oqarpoq Doris Jakobsen aammalu suleqatigiinnerup ingerlaqqinnissaa kaammattuutigalugu. 

- Suliassaqarfinni ataatsimoorluta aaqqiissuteqarfigisinnaasatsinni suleqatigiilluarneq ingerlatiinnartigut, oqarpoq Nunani Avannarlerni Suleqatigiinnermut Naalakkersuisoq.

Islandip aalisarnermut nunalerinermullu ministeria, Sigurdur Ingi Jóhannson, taamatuttaaq saqqummiivoq, tassani Islandip misilittagai iluaqutsiullugit aalisakkanik avammut tunisisarnerup ineriartortinnissaanut Kalaallit Nunaata periarfissaqarnera erseqqissarlugu. Island ikiut arlallit ingerlaneranni aalisakkanik nutaanik nunanut allanut timmisartumik assartuussisarnermik misilittagaqarluarpoq, tamannalu qaffasinnerusunik akeqartitsiviusarpoq. Islandimi aalisarnermut ministerip aamma erseqqissarpaa, Kalaallit Nunaat, Savalimmiut aamma Island ataatsimoorunik annertunerusumik sunniuteqarsinnaassasut taamaalillutillu Atlantikup avannaani aqutsisinnaassallutik, tamannalu aamma pissaanilissuarnut sunniuteqartitsinerusinnaavoq. 

Savalimmiuni angallannermut ministerip Henrik Old-ip saqqummiussinermini Tunup avannaani sinerissap avataani uuliasiorluni qillerinerit nalorninartoqartillugit oqaatigaa, tassami ajutoortoqassappat pisariaqartunik upalungaarsimasoqanngimmat.

Naalakkersuisoq Doris Jakobsen sammisaqarluni ataatsimeersuarneq pillugu naggataarutaasumik oqarpoq: 

- Peqataanissamut periarfissinneqarama aammalu ukioq manna sammisaqarluni ataatsimeersuarnermi saqqummiussisinnaallunga nuannaarutigisorujussuuara. Uanga nammineerlunga Inatsisartuni ilaasortatut Nunat Avannarliit Killiit Siunnersuisooqatigiiffianni ilaasortaanikuuvunga, taamaattumik suleqatigiinnissamut periarfissat oqallisigalugit nunani avannarlerni ikinngutigiittut katersuukkaangatta tamatigut nuannertarpoq, oqarpoq Doris Jakobsen.


Saamerlermit: Savalimmiuni angallannermut ministeri Henrik Old, Islandimi aalisanrermut nunalerinermullu ministeri Sigurdur Ingi Jóhannson aamma Peqqissutsimut Nunanilu Avannarlerni Suleqatigiinnermut Naalakkersuisoq Doris Jakobsen.



Paasisaqarnerorusuttut attavigisinnaavaat Naalakkersuisumut allatsi Rosa Thorsen, +299 55 33 03 rosat@nanoq.gl.