Akiuussutissat Saqqamut Qeqertamullu anngutissapput

Kalaallit Nunaanni Uumasunut Nakorsaqarfik Inuussutissalerinermullu Oqartussaaffik, ONIO, aamma Qaasuitsup Kommunia tallimanngornermi isumaqatigiissuteqarput qimminut akiuussutissat timmisartumik Saqqamut ualeru, tallimanngornermi januaarip 29-anni, anngunneqassasut Qeqertamullu aqagu, arfininngornermi januaarip 30-anni.

Uumasut nakorsaata Ilulissaniittup kommunimi akisussaasut qimmit nappaataata tunillaassuunnerata pinaveersaartinneqarnissaanik ilitsersuussimavai, Qeqertami Saqqamilu qimmit akiuussutissamik kapitinneqartarnissaannik aamma sukumiisumik ilitsersorsimallugit.

Qimmit akiuussutissamik kapineqartinnagit qimmit napparsimasut immikkut inissinneqartassapput toqunneqassallutillu. Qimmit pitunneqanngitsut pitunneqassapput/ungaluukkamiissallutik, qimmeqatigiikkuutaallu immikkoortinneqassallutik. Qimmit pitunneqanngitsut, pigineqanngitsut, toqunneqartassapput.

Ima akiuussutissanik kapisisoqartassaaq: nunaqarfimmi kommunip qimmilerisuata akiuussutissaasivik akisussaaffigissavaa aamma qimmilinnut akiuussutissanik agguaassineq akisussaaffigissallugu. Qimmilerisoq qimmilinnut akiuussutissamik kapisinissamik ilitsersuisassaaq.

Qimmilerisoq nammineerluni akiuussutissanik kapisisassanngilaq, kapisisassaguni qimmimiit qimmimut nappaammik tunillaassuisinnaassammat. Erseqqissaassutigineqassaaq innuttaasoq, qimmilik, nammineerluni akiuussutissanik aallersinnaanngimmat.

Pisortat erseqqissaassutigerusuppaat akiuussutissaq sapaatip akunneri pingasut aatsaat qaangiukkaangata sunniuteqalersarmat, taamaattumik inassutigineqarpoq qimmit napparsimanngitsut akiuussutissamillu kapitinneqarsimanngitsut tamarmik piaarnerpaamik kapitinneqassasut.

 

Attavigineqarsinnaavoq: Óluva Niclasen, immikkoortortami pisortaq, Kalaallit Nunaanni Uumasunut Nakorsaqarfik Inuussutissalerinermullu Oqartussaaffik. Mail: uumasut@nanoq.gl