Meeqqanut innarliisarneq akuerinngilarput

Naalaakkersuisut siulittaasuat Kim Kielsen aamma Meeqqat Illersuisuat Aviâja Egede Lynge meeqqat ukiuannut atatillugu naapissimapput Kalaallit Nunaanni meeqqat atugaat eqqartorniarlugit.

Naalakkersuisut siulittaasuat Kim Kielsen kiisalu Meeqqat Illersuisuat Aviâja Egede Lynge isumaqatigiipputinuiaqatigiit tamarmiullutik akisussaaffimmik tigusisariaqartut meeqqanut innarliisarneq unitsinniarlugu, tamarmillu pisussaasut meeqqat pisariaqartitisut ikiussallugit. Tamarmik akisussaaffeqarput, tassa Namminersortut, kommuunit, suliffeqarfiit, angajoqqaat allallu innuttasut.

Naqissuserluartariaqarparput meeqqatta paaqqutarinissaannut pissusigut allanngortittariaqaratsigit, oqarput Naalakkersuisut siulittaasuat Kim Kielsen kiisalu Meeqqat Illersuisuat Aviâja Egede Lynge. Meeqqat Illersuisuata siunnersuutaa aallaavigalugu Namminersortut MIO suleqatigalugu misissuiniarput meeqqanut ileqqorissaarnissamut oqallittarfimmik pilersitsinissamik. Meeqqanut ileqqorissaarnermut oqallittarfiup oqallisissat pingaarutillit saqqummiuttassavai, soorlu suut naleqartitat tunuliaqutigissanerigut meeqqatta illersornissaannut, meeqqatta perorsarnissaannut qanorlu assersuutigalugu killiliisarnissatsinnut, oqallisigalugu inuiaqatigiit ikittunnguit qanoq qulequttat ilungersunartut oqimaatsullu passuttarsinnaassaneraat meeqqat, ilaqutariit ataasiakkaat inuillu ataasiakkaat sullinnissaat qulakkeerniarlugu.

Naapinneq iluatsillugu Naalakkersuisut siulittaasuata Meeqqat Illersuisuat ilisimatippaa, meeqqat nammineq misigissuseqarfigisuugamigit, taamaammallu ukioq 2016 meeqqat ukiuattut suaarutigisimagini. Tassunga atatillugu suleqatigiiliortoqarsimavoq Naalakkersuisunut ilaasortat Doris Jakobsen, Martha Lund Olsen kiisalu Nivi Olsenip akornanni ilaasortaqartumik. Suleqatigiisitap taassuma qulakkiissavaa immikkoortortaqarfiit akornanni meeqqanut suliniutit ataqatigiissaarnissaat.

Kiisalu isumaqatigiissutigineqarpoq Naalakkersuisut siulittaasuat Meeqqallu Illersuisuat ukiup ingerlanerani akuttunngitsumik naapittassasut meeqqanut tunngasunik ilisimatitseqatigiittassallutik.

”Meeqqanut Illersuisutut nuannaarutigaara meeqqat isiginiarneqarmata, kisiannili naqissuserusuppara qanoq iliuuseqarnissaq pisariaqartikkatsigu, tamattalu akisussaaffimmik tigusisariaqaratta”, Meeqqat Illersuisuat naggasiivoq.

 

Inussiarnersumik inuulluaqqusilluta

Aviâja Egede Lynge aamma Kim Kim Kielsen

 

Attavissaq: oqarasuaat +299 346944 imalt. angallattagaq +299 531274.