Qimmit nappaataannik akiuiniarneq

Qaasuitsup Kommunia aamma Aalisarnermut, Piniarnermut Nunalerinermullu Naalakkersuisoqarfik ippassaq ataatsimiillutik siunersueqatigiinnerminni isumaqatigiissutigivaat qimmit nappaataat tunillaassortinniarnagu akiuussutissanik kapisisarnernut ilitsersuusiortoqassasoq pisortallu aamma qimmit nappaataannut akiuiniarnermut aamma suut suliassarissaneraat.

Kalaallit Nunaanni Uumasunut Nakorsaqarfik Inuussutissalerinermullu Oqartussaaffiup, UNIO, ilisimavaa Qeqertami qimmit nappaalallutik toqusut 70-it missaanniittut – amerlasuut marluk missaanni ukioqarlutik.

UNIO-p sakkortuumik erseqqissaassutigerusuppaa qimmiutillip akisussaaffigigaa qimmini akiuussutissamik kapitittassallugit. Ilisimaneqarpoq qimmit nappaataat nunatsinni atugaasarmat, qimmillu napparsimallutik toqusarmata.

- Taamaattumik UNIO qimmiutilinnut ukiorpassuarni inassuteqartuarpoq qimmiaraatitik akiuussutissamik kapitittassagaat, qimmiaqqallu ungaluukkaniitinneqartassasut. Oqartussaaffiup aamma erseqqissarusuppaa akiuussutissaq nappaatinut katsorsaataasinnaanngimmat, napparsimalereersut katsorsarneqarsinnaanatik, UNIO-mi immikkoortami pisortaq Óluva Niclasen erseqqissaavoq.

Qimmit nappaalalersinniarnagit, soorlu Qeqertami maannakkut nappaalasoqartoq, pingaaruteqarluinnarpoq qimmit 12-nit 16-inut qaammateqartillugit akiuussutissamik kapitinneqartarnissaat.

Sumiiffinni immikkut ittuni inassutigineqarpoq, qimmiaqqat qaammat ataaseq qaangiukkaangat akiuussutissamik kapiteqqittarnissaat.

- Arnavissat ilumiullit qimmit nappaataannut parvovirusimullu akiuussutissamik kapitinneqaqqittassapput. Taamaalilluni immua piaqqaminut milutsitsinermigut akiuussutissaqalereersimassaaq, miluttua nappaatinut qaammatini siullerni illersugaalissalluni, UNIO-mi immikkoortortami pisortaq Óluva Niclasen oqarpoq.

Kingorna qimmit nappaataannut parvovirussimullu akiuussutissamik kapitinneqarnissaat inassutigineqarpoq.
Qimmit akiuussutissamik kapitinneqarsimasut nappaatinut akiuussutissaqarluartartorujussuupput, nappaalanissaannullu akiussutissaqartarlutik. Qimmit akiuussutissamik kapineqarsimanngitsut amerlanertigut toqusarput.

Pisortat qimmit napparsimassutigilersinnaasaannut akiuussutissanik, qimmit nappaataannut, parvovirusimut tingullunnermullu ataatsikkut atorneqarsinnaasumik kapitinneqartarnissaat qangalili inassutigiuarlugulu piniuussisuartuupput, naak tamanna inatsisitigut pisussaffiginngikkaluarlugu.

Qaasuitsup Kommunia aamma Aalisarnermut, Piniarnermut Nunalerinermullu Naalakkersuisoqarfik siunersiuinerminni uku sulissutigissallugit isumaqatigiissutigivaat.

  1. Tunillaassuunneq unitsinneqassasoq, qimmit inersimasut qimmiaqqallu angalaannartussaanngitsut, qimmiutillip qimmini kisiisa ukkatigissagai qimmeqarfinnullu allanut pisassanngitsoq. Allat qimmiisa anaannik quuinillu aamma attuissanngitsoq. 
  2. Qimmit napparsimasut pallinneqartassanngitsut imaluunniit piaartumik toqutsisoqartassasoq. Qimmit toqunneqarsimasut piaarnerpaamik suujunnaartinneqartassasut. 
  3. Pisortat Qaasuitsup Kommunia suleqatigalugu qimmit napparsimanngitsut akiuussutissamik kapitinneqarnissaannik aallartitsisoqassasoq.

Kingumut eqqaassutigineqaqqissaaq qimmiutillip qimmini namminneerluni akiussutissamik kapitissallugit akisussaaffigimmagit. Namminersorlutik Oqartussat kommunillu taamaallaat pisussaatitaaffeqarput qimmit perlerornerannut akiuussutissamik kapuuisoqassatillugu.

 

Attavigineqarsinnaasoq Ólavu Niclasen, immikkoortortami pisortaq, Kalaallit Nunaanni Uumasunut Nakorsaqarfik Inuussutissalerinermullu Oqartussaaffik. Mail: uumasut@nanoq.gl.