"Kalaallit Nunaata Siunissaraatigut” - ilisarititsissutinik filmiliaq

Stemningsbillede af Indlandsisen

”Kalaallit Nunaata Siunissaraatigut” kalaallinik ilinniartunik ilinniakkaminnik aallartereersunut, imaluunniit ilinniarnerminnik naammasseqqammersunut ilisarititsissutinik aqqaneq-marluusunik naatsunik filmiliaavoq. Maligassiuisut ilinnialinnginnerminni ilinniarnermilu nalaanni qaangerniakkatik, eqqarsaatitik misilittakkatillu filmimi oqaluttuaraat. Kalaallit inuusuttut ilinniagassaminnik toqqaanerminni isumassarsisinnissaat nukittorsarnissaallu, naatsorsuutiginngisamik unammilligassat kukkusumillu toqqaanerit minnerulersinniarlugit filmini anguniarneqarpoq.

”Neriuutigaara filmit taakku aqqutigalugit pitsaasumik ilisimannilluartumillu siunnersorneqarnernit ilallugit amerlanerit imminnut tulluuttumik ilinniakkamik toqqaasassasut naammassinnillutillu,” Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq Nivi Olsen oqarpoq.

Filmit Inuussutissarsiornermut, Suliffeqarnermut Niuernermullu Naalakkersuisoqarfimmit aamma Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfimmit ataatsimoorullugu aningaasaliiffigineqarput. Filmit KNR-ikkut aallakaatinneqartassapput, soorluttaaq Namminersorlutik Oqartussat ilinniarnermut tunngasunik isaaviani www.iserasuaat.gl -imi kiisalu Youtube-mi takuneqarsinnaassasut (www.youtube.com/watch?v=owXRQ5q_QI4&feature=youtu.be&list=PLKvzVari-Q3phlblfSWCIIPqDbKn7emYY).

Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfimmi immikkut siunnersorti Jesper V. Nielsen, jvni@nanoq.gl, toqq. +299 34 56 23