Arferup kigutai, imermi misileraanerit aamma uumasut takorluugaannaat

Ukioq manna aammaloorluni Pinngortitamut, Avatangiisinut Inatsisinillu Atuutsitsinermut Naalakkersuisoqarfik Unnuk kulturisiorfimmi takusarluarneqarpoq. Tassani ilaatigut arferit kigutai takuneqarsinnaallutik, imermik pinnguartoqarsinnaalluni aammalu uumasunik takorluugaannarnik sanasoqarsinnaalluni.

”Inuit taama amerlatigisut Naalakkersuisoqarfimmi takullugit aammalu nukissiamik atuinnginnerulluta aammalu avatangiisinik mingutsitsinnginnerulluta qanoq pissusilersorsinnaanersugut isumassarsiaat pitsaasut tusarnaarlugit, nuanneqaaq”, oqarpoq nuannaarluni Pinngortitamut, Avatangiisinut Inatsisinillu Atuutsitsinermut Naalakkersuisoq Mala Høy Kúko.

Innuttaasut 1000-it alakkaapput
Nuuk Centerimi qatanngutigiit Elsner-ikkut erinarsornissaannut Pinngortitamut, Avatangiisinut Inatsisinillu Atuutsitsinermut Naalakkersuisup Mala Høy Kúko-p matut ammarmagit, meeqqat inersimasullu amerlasoorpassuullutik katersuussimasut utaqqipput. Tamatuma kingorna innuttaasut 1000-it missaanniittut naalakkersuisoqarfiup quleriiaani inissisimaffianut, aliikkusersuutinik sammisassarpassuaqartunut, alakkaapput.

Pinngortitamik allanngutsaaliuineq angisuunut mikisunullu
timmissat kivikkat, nannup amia arsaarinnissutaanikuusoq aamma arferit soqqaat saqqumitinneqarput, taamaalilluni angisuut mikisullu nunatsinni uumasut sunnertianerpaat ilaat qanittuaqqamik takusinnaallugit. Tamanna pinngortitap uumasullu illersorneqarnissaat pillugu pitsaasumik oqaloqatigiilersitsivoq.

Imeq imigassaq tarajuiagaq nunaqarfimmit Saarlumeersoq
imeq imigassaq tarajuiagaq, imeq imigassaq tatsineersoq aamma imeq immameersoq ukioq manna imermik sassaallerfimmi ilaatinneqarput. Tassani imermik misileraasoqarsinnaavoq aammalu siunissami imermut imigassamut aamma immani avatangiisinut silap pissusaata allanngoriartornera qanoq kinguneqarsinnaanersoq paasisaqartoqarsinnaalluni.

Eqqakkanit uumasunut takorluugaannarnut
Manniit puui, puussiat plastikkit aamma immuit puui. Tamarmik puukut, meeqqat uumasunik takorluugaannarnik kusanarluinnartunik nutaaliorlutillu sanallutik atorpaat. Uumasut maannakkut Namminersorlutik Oqartussat inersuanni takuneqarsinnaapput.

Pinngortitamut, Avatangiisinut Inatsisinillu Atuutsitsinermut Naalakkersuisoqarfiup Nuummi innuttaasut, unnummut nuannersumut nuannivissumik, ilikkagaqarnartumik soqutiginartumillu oqaloqatigiiffiusumut, qutsavigai.

Neriuppugut aappaagu takoqqissallusi.

2016-imi Unnuk kulturisiorfik pillugu apeqqutissaqaraanni aamma paasissutissanik annertunerusunik piniaraanni attaveqarfigineqassaaq immikkoortortaqarfimmi pisortaq Paninnguaq Clasen, pcni@nanoq.gl, oqarasuaat 34 54 16.