Silap pissusiata allannguutissai aallunneqarput

Nalunaarusiani nutaani arfiniliusuni siunissami silap pissusiata allannguutissai aallunneqarput

Danmarkip aamma Kalaallit Nunaata Silasiorfiata (DMI)-p siunissami Kalaalit Nunaanni silap allannguutissai pillugit ilisimasat nutaat nalunaarusiani arfiniliusuni saqqummiunneqaqqammersuni katersorpai.

”Silap pissusia pillugu nalunaarusiat arfiniliusut inuiaqatigiit siunissami silap allannguutissaannut akiuussinnaanerulersinniarlugit sulinitsinnut iluaqutigineqarsinnaapput. Inuiaqatigiittut silap pissusiata allannguutaasa kingunerisaanik unammilligassanut piareersimassasugut, kisiannili aamma atorluarsinnaasatsinnik periarfissaqartoq nalunaarusiat takutippaat. Neriuppunga kommuunit suliffeqarfiillu inuussutissarsiutinik ingerlataqartut, aammalu allat ilisimasat nutaat sulinerminni atorumaaraat, taamaalilluta silap pissusiata allannguutai takusariikkavut sulilu takkuttartussat sapinngisamik pissarsiaqarfiginissaat qulakkiissagatsigu”, Pinngortitamut, Avatangiisinut Inatsisinillu Atuutsitsinermut Naalakkersuisoq Mala Høy Kúko oqarpoq.

Nalunaarusiat arfiniliusut taakku DMI-p Pinngortitamut, Avatangiisinut Inatsisinillu Atuutsitsinermut Naalakkersuisoqarfiup kaammattuineratigut suliarineqarput, aammalu kommuunit killeqarfii malillugit; Kommune Kujalleq, Qeqqata Kommunia, Qaasuitsup Kommunia og Kommuneqarfik Sermersooq, nalunaarusianut marlunnut avillugit agguagaapput. Nuna Allanngutsaaliugaq immikkut sammineqarpoq. Agguaanermi ilisimasanik nutaanik nunap iluani sumiiffinnilu pilersaarusiornermut ineriartortitsinermullu ajornannginnerusumik atuisinnaanissaq siunnerfigineqarpoq.

Nalunaarusiat siunissami silap pissusissaa pillugu ilisimasanik iluaqutissanik imaqarpoq. Assersuutigalugu nalunaarusiat silap kissassusiani, nunami qeriuaannartumi piffissamilu naasoqarfiusumi allannguutissatut naatsorsuutigisat pillugit imaqarput. Paasissutissat taakku ilaatigut nunalerineq, attaveqaatit takornariaqarnerlu pillugit sulinermi iluaqutigineqartussaapput.

Aatsaat siullermeerluni Kalaallit Nunaanni silap pissusiata allannguutissaattut naatsorsuutigisat pillugit paasissutissanik, nunap immikkoortuinut tunngassuteqarluinnartunik saqqummertoqarpoq.
Nalunaarusiat uunga aaneqarsinnaapput: http://www.dmi.dk/laer-om/temaer/klima/groenlands-klima/

Annertunerusumik paasisaqarusunnermi Naalakkersuisup allattaa Elise Uupi Kuitse, +299 34 54 14-imut, e-mail: eukl@nanoq.gl, imaluunniit immikkoortortaqarfimmi pisortaagallartoq Karen Anne Arleth, +299 34 54 65-imut, e-mail: knar@nanoq.gl, attaveqarfigineqarsinnaapput