Vittus Qujaukitsoq Arctic Frontiersimut ataatsimeersuaqataavoq

Aningaasaqarnermut, Aatsitassanut Nunanullu Allanut Naalakkersuisoq 2016-imi ataatsimeersuarnermi Arctic Frontiers pingaarnertut oqalugiartuuvoq.

Ataatsimeersuarneq Arctic Frontiers ulluni makunani Norgemi Tromsømi ingerlanneqarpoq. Ukioq manna ataatsimeersuarnermi qulequtaapput suliffissuaqarneq avatangiisillu, aammalu Isittumi piujuartitsisussamik ineriartortitsinissamik qulakkeerinissap pingaaruteqarnera, aamma inuiaqatigiit avatangiisillu eqqarsaatigineqarnissaat ilaatinneqarlutik.

Aningaasaqarnermut, Aatsitassanut Nunanullu Allanut Naalakkersuisoq ullumi 25. januaari ataatsimeersuarnermi Arctic Frontiers pingaarnertut oqalugiartut ilagaat. Ammaanermi oqalugiartuni allani ilaapput Norgep nunanut allanut ministeria Børge Brende, Finlandip nunanut allanut ministeria Timo Soini, Sverigep periusissatut ineriartortitsinermut nunanilu avannarlerni suleqatigiinnermut ministeria Kristina Persson, kiisalu Sametingimi Præsidenti Aili Keskitalo.

Ataatsimeersuarneq Arctic Frontiers ukiut tamaasa nunanit 29-nit amerlanerusuneersut peqataasunit 1300-init amerlanerusunit ornigarneqartarpoq, aammalu uani www.arcticfrontiers.com toqqaannartumik malinnaaffigineqarsinnaalluni.

Naalakkersuisut Kalaallit Nunaanni avatangiisinik allanngutsaaliuinissamik pisariaqartitsinermut oqimaaqatigiissitsiniarnermik suliaqarnerat, kiisalu aningaasaleerusussuseqalersitsiniarnermik pisariaqartitsineq aammalu Kalaallit Nunaanni siuariartortitsisinnaasumik atugarissaarnerulersitsisinnaasumillu inuussutissarsiornermi nutaamik ineriartortitsiniarneq, Vittus Qujaukitsup oqalugiarnerani sammineqarput.

Oqalugiarnermini Vittus Qujaukitsup erseqqissarpaa ”Issittumi inuit tassaapput pisariaqartunik aalajangiisussat. Nunat allat Issittup avataaniittut nunap immikkoortuata Issittumiittup siunissaa aalajangertussaanngilaat. Inuiaat Issittumiittut inuunerminni atugassatik siunissartillu, nunani tamalaani suleqatigisavut suleqatigalugit, namminneerlutik aalajangersartussaavaat”

Ukioq manna ataatsimeersuarnermi Arctic Frontiersimi aamma Tromsømi, Indigenous Peoples’ Secretariat (IPS) ammarneqarnera aamma malunnartinneqarpoq. Indigenous Peoples’ allattoqarfia Issittumi Siunnersuisooqatigiinni nunap inoqqaavisa kattuffiinut ikiuuttartoq, ukioq manna Københavnimiit Tromsø-mut nuuppoq, tassani maannakkut Issittumi Siunnersuisooqatigiit allattoqarfiat 2013-imiilli aalajangersimasumik Tromsømiilersimasoq, peqatigalugu inissisimalissalluni. Indigenous Peoples’ Secretariat ammarneqarnera Norgemi nunanut allanut ministerip Børge Brendep aamma Danmark aamma Kalaallit Nunaat sinerlugit Vittus Qujaukitsup oqalugiarnerisigut malunnartinneqarpoq. Ataatsimeersuarnermut atatillugu aamma Issittumi Siunnersuisooqatigiit ataanni, amerikamiut siulittaasoqarfiannit aamma Issittumi Siunnersuisooqatigiinni naalagaaffiit aallartitaqartut aallartitaannik peqataaffigineqartumik, ataatsimiinnerit ingerlanneqarput.

Vittus Qujaukitsup oqalugiaataa uani atuaruk.

 

Apeqqutissaqarluni attaveqarfissaq: immikkut siunnersortit Uiloq Mulvad Jessen +45 51251598 / Naalakkersuisup allattaa Nauja Møller +299 544142