Innuttaasunik ataatsimiititsinermi teknikki nutaaq iluatsilluartumi misilerarneqarpoq

Sapaatip akunnerani qaangiuttumi Aningaasaqarnermut Naalakkersuisoqarfik nuna tamakkerlugu pilersaarusiassamut nassuiaatissaq pillugu Tasiilami, Sisimiuni Ilulissanilu innuttaasunik ataatsimiititsivoq. Innuttaasut ataatsimiitinneqarneranni ’toortakkat’ iluatsilluartumik atorneqarput. Toortakkat ungasianit aquutaapput, innuttaasunik ataatsimiititsinermi peqataasunut tamanut agguaanneqartut. Toortaatillu apeqqutigineqartunut kinaassutsimik isertuussilluni akissuteqarnermi atorneqarsinnaapput. Akissutigineqartullu tamarmik skærmimi apeqqutit allassimaffianni ingerlaannartumik takuneqarsinnaapput. Atortorissaarut tuluttut Audience Responce Systemimik (ARS) ateqarpoq.

Inoqarfivut qanoq imminnut assersuunneqarsinnaappat
Inoqarfitta qanoq oqimaaqatigiissumik ersarissumillu imminnut assersuunneqarsinnaanerannut tunngasunik Naalakkersuisut innuttaasunit isumassarsinissamik kissaateqarnerat, innuttaasunik ataatsimiititsinermi qitiuvoq. Innuttaasullu ataatsimiitinneqarneranni tamanna isumassarsiffigilluarneqarpoq. Ilaatigullu innuttaasut oqartussaaqataanermik qanoq paasinninnerannik aperineqarput. Akissutigineqartunilu qanimut piffimmilu oqartussaaqataaneq innuttaasut pingaartinnerugaat takuneqarsinnaavoq.

Peqataasut akuulluartut
Innuttaasunik ataatsimiititsinerni tamani, innuttaasut 15-it 40-llu akornanni amerlassuseqartut takkupput. Nalinginnaasumillu saqqummiussisoq kisimi saqqummiussuisinnagu, innuttaasut ungasianit aquuteeraq ikiortigalugu isummaminnik saqqummiussinissamik kaammattorneqarput. Apeqqutinut arlalinnut akissutigineqartut agguataarsimanerat ataatsimeeqataasunut tamarmiusunut tupaallaataapput, tamannalu oqaaseqarfiginninnissamut periarfissiilluarpoq.
- Innuttaasut toortaatit atorlugit akuliutsinneqarnerisigut, innuttaasut ataatsimiititsinermut akuunerunerat misigaarput. Taamatullu periuseqarnerup akulikinnerusunik atornissaa Naalakkersuisut eqqarsaatersorfigissavaat, Aningaasanut, Aatsitassanut Nunanullu allanut tunngasunut Naalakkersuisoq Vittus Qujaukitsoq oqaluttuarpoq.

Iluatsitsineq pisussaaffiliivoq
Innuttaasut nalinginnaasumik ataatsimiitinneqartarnerannut sanilliullugu, innuttaasuik ataatsimiititsinerup ingerlanerata nalaani kinaassutsimik isertuussilluni isummamik ersersitsisinnaanermik periarfissaq ataatsimiisitsinermik pitsannguutaasoq, peqataasut isumaqatigiissutigaat.
Innuttaasunillu ataatsimeeqataasunit innuttaasunik ataatsimiititsinerit amerlanerusut periuseq nutaaq atorlugu ingerlanneqalerumaartut ilimagalugu oqaatigineqarpoq. Taamattaarlu innuttaasunit isummersuutitut saqqummiunneqartut, innuttaasut ataatsimiitinneqarnerisa kingorna oqartussaasunit suliamut ersarissumik ilanngunneqarnissaat kissaatigineqarpoq.

Innuttaasunik ataatsimiititsinerit amerlanerit ingerlanneqaqqissasut
Februaarimi Qaqortumi Nuummilu aamma innuttaasunik ataatsimiititsinissaq pilersaarutaavoq. Periarfissaqalerpallu inoqarfinni allani innuttaasunik ataatsimiititsinerit taamatut ingerlanniarneqassapput.
Innuttaasut ataatsimiitinneqarnerini atortussiat nuna tamakkerlugu pilersaarummut nassuiaasiornermi, Inatsisartut ukiaanerani ataatsimiinneranni saqqummiunneqartussamut suliarinninnermi atorneqassapput.

Paasissutissat erseqqinnerusut uunga saaffiginnilluni pissarsiarineqarsinnaapput: Projektleder Klaus Georg Hansen, kgha@nanoq.gl imaluunniit 54 73 46