Naalakkersuisut aamma Qeqqata Kommunia qinnuteqarnissamut qaaqqusipput

Naalakkersuisut aamma Qeqqata Kommunia sukisaarsaatigalugu aalisarnermik neqerooruteqarnissamut ingerlatsinissamut akuersissummik qinnuteqarnissamut qaaqqusipput

Innuttaasut aamma suliffeqarfiit soqutiginnittut Qeqqata Kommuniani eqalunniarluni sukisaarsaatigalugu aalisarnermik neqerooruteqarnissamut kisermaassisussaatitaalluni ingerlatsinissamut akuersissummik qinnuteqaqquneqarput.

Qeqqata Kommunia kuuit katillugit 16-it atugassiissutiginiarlugit Kommunimut pilersaarummut tapiliussaq nr. 27-imi aalajangerpoq, tassani innuttaasut suliffeqarfiillu eqalunniarluni sukisaarsaatigalugu aalisarnermik neqerooruteqarnissamut kisermaassisussaatitaalluni ingerlatsinissamut akuersissummik qinnuteqarsinnaallutik.

Kuuit 16-it taakkua ingerlatsinissamut akuersissuteqarfittut atugassiissutigineqarnerat, Naalakkersuisut takornariartitsisarnermut suliassaqarfimmi periusissaannut ilaasutut isigineqassaaq, tassani siunertaalluni Kalaallit Nunaanni takornariartitsisarnermik inuussutissarsiornermi namminersortut aningaasaliisarnerisa annertusitinnissaa, taamaalillunilu siunissami siuariartortitsinerup suliffissaqartitsiniarnerullu annertunerulersinnissaat. Suliniuteqarneq taanna suliassaqarfiit arlallit Naalakkersuisut nunatsinni kommunit suleqatigalugit takornariartitsinermik suliaqarnernut assigiinngitsunut ingerlatsinissamut akuersissuteqarfissatut immikkoortissallugit pilersaaruteqarfigisaasa, siullersaraat.

Sukisaarsaatigalugu aalisarnissamut ingerlatsinissamut akuersissut sumiiffinni nunami aalajangersimasuni takornariartitsinermut akuersissuteqartarnissaq pillugu Inatsisartut inatsisaat nr. 19, 3. december 2012-meersoq aamma Sumiiffinni nunami aalajangersimasuni takornariartitsinermut akuersissuteqartarnissaq pillugu Inatsisartut inatsisaat nr. 19, 3. december 2012-imeersup allanngortinnissaa pillugu Inatsisartut inatsisaat nr. 15, 3. juni 2015-imeersoq (Inatsisip atuuffigisaa sukisaarsaatigalugu aalisarnermut akuersissutinut sumiiffikkaanullu pilersaarutinut piginnaatitsissummik ilaqartilerlugu annertusissaaq) malillugit tunninneqassaaq.

Sukisaarsaatigalugu aalisarnissamut ingerlatsinissamut akuersissummik tunniussinissamut periarfissiinissamut siunertaavoq, namminersortut aningaasaliinissaannut patajaatsunik killissaliussanik atugassaqartitsilernissaq, taamaalillunilu inuiaqatigiinnut kalaallinut iluaqutaasumik Kalaallit Nunaanni takornariartitsinermik inuussutissarsiornermi siuariartortitsinissaq.

Sukisaarsaatigalugu aalisarnermik neqerooruteqarnissamut ingerlatsinissamut akuersissummik tunniussisoqassappat, sumiiffiit sammisassanut allanut, soorlu sunngiffimmi aalisarnermut, atorneqarnissaannut innuttaasunut killilersuisoqassanngitsoq, oqaatigissallugu pingaaruteqarpoq.

Qinnuteqaammik nassiussinissamut killissaliussaq tassaavoq ataasinngorneq ulloq 7. marts 2016, nal. 12.00.

Ingerlatsinissamut akuersissummut najoqqutassat piumasaqaatit, maleruagassat atugassarititaasullu tamaasa ilanngullugit, qinnuteqarnermi immersugassaq aamma qinnuteqarnermut ilitsersuut ilanngullugit pissarsiarineqarsinnaapput uani www.naalakkersuisut.gl. Qinnuteqaqqusilluni allakkiamut apeqqutissaasinnaasut Inuussutissarsiornermut, Suliffeqarnermut Niuernermullu Naalakkersuisoqarfimmut apeqqutigineqarsinnaapput. Apeqqutit tiguneqartut aammalu akissuteqaatit taakkununnga tunngasut kinaassuseq takuneqarsinnaajunnaarsillugu Naalakkersuisut nittartagaanni tamanut ammasumik saqqummiunneqassapput.

Qinnuteqaqqusilluni qaassusinermi allakkiamut apeqqutissaqaraanni Inuussutissarsiornermut, Suliffeqarnermut Niuernermullu Naalakkersuisoqarfimmut e-mailikkut saaffiginnittoqassaaq, uunga: isiin@nanoq.gl

Qinnuteqarnissamut qaaqqusissut uani takuuk.