Inuit pisinnaatitaaffii pillugit Kalaallit Nunaat misilitsippoq

Naalagaaffiit Peqatigiinni inuit pisinnaatitaaffii pillugit siunnersuisooqatigiinni Genévemiittumi qallunaat aallartitaat qallunaat nunanut allanut ministeriannit siuttuuffigineqartut peqatigalugit, Nunanut allanut pisortaqarfimmiit aallartitat januarip ulluisa 21-anni 2016 Kalaallit Nunaata inuit pisinnaatitaaffiinut tunngasut eqqortinneqarnersut saqqummiuppaat.

Inuit pisinnaatitaaffii pillugit inuit pisinnaatitaaffiinut tunngasut isumaqatigiissutit malillugit nunarsuarmioqatigiinnut nalliuteqqittartumik naliliisarneq (UPR) ukiut sisamakkaarlugit nunat Naalagaaffiit Peqatigiinnut ilaasortaasut 193-iusut ukiut sisamakkaarlugit misilitsissutigisarpaat nalilerneqaatigalugu. Periutsip taassuma siunertaraa nunat ilaasortaasut inuit pisinnaatitaaffiinut isumaqatigiissutaasut pisussaaffiliisuusut eqquutsinneqarsimanersut qulakkeerneqarnissaat.

UPR siullermeersumik 2011-mi qallunaat nunaannit peqataaffigineqalersoq nunap iluani inuit pisinnaatitaaffii pillugit nalunaarusiortoqarsimavoq – misilitsinnermi atugassiaasumik. Nalunaarusiaq Kalaallit Nunaannut tunngassuteqartoq nalunaarusiami tassani ilaatinneqarpoq. Nalunaarusiaq taanna misilitsinnermi suleqatigiissunit apeqqarissaarnermi tunngaviusumik atorneqarpoq.

Apersuisoqarnerani Nunanut allanut pisortaqarfimmit aallartitat nassuiaatigaat 2011-p kingorna Kalaallit Nunaanni ineriartorsimaneq, pingaartumillu Kalaallit Nunaata kingullermik UPR-ertoqarmat innersuussaasut akuersissutigisimasallu – persuttaasarneq akiorniarlugu periusissiaq itisiliiffigineqarluni.

Oqallinnermi qallunaat nunaanni pissutsit ukkatarineqarput, taamaattorli aamma Kalaallit Nunaanni pissutsit apeqquteqarfigineqarlutik. Pingaartumillu persuttaasarnerit, meeqqanik kinguaassiutitigut kanngutsaatsuliortarnerit, ilinniartitaaneq taamatullu Avanersuarmiut nunap inuiisut killiffiat apeqqut sammineqarput, Naalagaaffiit Peqatigiinnilu nunanit ilaasortaasunit innersuussisoqarpoq Kalaallit Nunaata innersuussat akuerissanerlugit aalajangiiffigisassaanik.

Nunanut allanut pisortaqarfimmi naggasiutigalugu saqqummiunneqarpoq Naalakkersuisut annertuumik meeqqat atugarisaannut apeqqutit ukkatarineqartut, pissutsillu pitsanngorsaaviginiarlugit suliniutit assigiinngitsut aallartinneqarsimasut.

UPR-imi misilitsinnermut Kalaallit Nunaat siullermeerluni 2011-mi peqataavoq tassani nunat Naalagaaffiit Peqatigiinnut ilaasortaasunit qallunaat nunaannut tassungalu atatillugu Kalaallit Nunaannut innersuussutinik apuussisoqarluni.
Paasissutissanik annertunerusunik pissarsisoqarsinnaavoq uunga attaveqarluni: Pernille Bengtsen, tlf. 553327