Naalakkersuisut Qaanaami innuttaasut inuussutissarsiortullu ataatsimeeqatigaat

Naalakkersuisut Qaanaami innuttaasunik pingasunngornermi 20. januaari ataatsimiititsipput inuussutissarsiortunillu innuttaasunillu sisamanngornermi 21. januaari aamma ataatsimeeqateqarlutik. Sisamanik aalajangersimasunik sammisaqarput: Aallartisaaneq takornariaqarnerlu, piniarneq aalisarnerlu, suliffeqarneq ilinniartitaanerlu kiisalu attaveqaqatigiinneq pilersuinerlu.

Aaqqissuussaanikkut unammilligassat

Qaanaami suliffissaaleqisut 80-it amerlapput Qaanaamilu nunaqarfinnilumi innuttaasut ikiliartorlutik. Taamaammat ilorraap tungaanut aallartitsisussanik iliuuseqartoqarnissaa pisariaqarpoq.

Qaanaap inissisimaffia attaveqaatitigut immikkut ittunik unammilligassaqartitsivoq – assartuineq angallannerlu killilerujussuullutik, tamannalu inuussutissarsiortunut – nunaqartunullu - ilungersunartorujussuulluni.

Pissanganartorpassuarnik tunisisoqarsinnaagaluarpoq suliareqqinneqarsinnaasunik, attaveqaatitigulli unammilligassat, soorlu innallagiaqarnikkut, imeqarnikkut assartuinikkullu, annertunerpaajupput.

Qaanaap pigisaani piniarneq pingaarutilerujussuuvoq kulturikkullu oqaluttuarisaanermi takornarianit, ingammik aasakkut takornariartaatinik umiarsuarlutik tikeraartartunit, soqutigineqarluarlutik, aammali qimusserlutik misigisassarsiorlutik takornariaqartarluni.

Innuttaasut soqutiginnilluartut

Innuttaasunik ataatsimiititsineq workshopeqarnerlu illoqarfimmiunit soqutigineqartorujussuuvoq. Ulluni marlunni taakkunani soqutiginnilluarlutik siunnersuuteqarput illoqarfiup piujuaannarnissaanik qulakkeerinnittussanik.

Naalakkersuisut siunnersuutinik aalajangersimasunik angerlaassaqassapput, Qaanaap, Qaasuitsup Kommuniata Namminersorlutillu Oqartussat suleqatigiissutigalugit qaammatini tulliuttuni suliassaannik.

Innuttaasut siunnersuuterpassuisa ilagaat: 

Piniarneq aalisarnerlu:

  • Najukkami inuussutissarsiuteqartut suleqtigalugit tunitsiviup pitsaanerusumik atugassaqalernissaa, teknikerinik il.il. ilanngullugit atorneqarsinnaallutik kiisalu tunitsivimmi ukioq naallugu imeqarsinnaalernissaa.
  • Pitsaanerusumik umiarsualiveqalernissaa tunisassiorluartoqarsinnaalersillugu
  • tunisassianik pitsaasunik, soorlu qaleralinnik, assigiinngitsunillu tunisisoqarsinnaalersillugu aalisakkanik – uumasunillu assigiinngitsunik. Taamannak iliuuseqarnikkut tunisassiat ilisimaneqartut Kalaallit Nunaata sinneranut siaruarterneqarsinnaalersinneqassapput
  • Misileraalluni aalisarnissamik aallartisaanerit Qeqertanilu umiarsuarmik tunitsiviliisoqarnissaa siunissami aaqqiissuteqarsiillugu.

Aallartisaaneq takornariaqarnerlu:

  • Pikkorissaanerit takornariartitsinermik piginnaasaqalersitsisut kissaatigineqarpoq, minnerpaamik aasakkut umiarsuarlutik takornariartunik sullissilluarnerulersitsisussamik oqaatsinik pikkorissaanerit kissaatigineqarlutik.
  • Angallannikkut pitsaanerusunik kiffartuussinissamut isumaqatigiissuteqartoqarnissaa, Qaanaap timmisartuussivigineqarnera sapaatip akunneranut ataasiaannartarmat tamannalu takornariaqarnermut inuussutissarsiornermullu nalinginnasumik aporfissiilluni.
  • Ilaatigut illoqarfimmi takornariat unnuiffigisinnaasaasa amerlisarnissaannut inuussutissarsiutinut tapiissutit pisariaqartinneqarnerat tikkuarneqarpoq.

Arbejdsmarked og uddannelse:

  • Meeqqerivinni perorsaasut amerlanerusut atorfinitsinneqarnissaat kissaatigineqarpoq.
  • Allamiut oqaasiinik piginnaanngorsaanerup nukittorsarniarlugu siunnersuutigineqarpoq nunani allani, soorlu Canadami, sivisuumik aallaarsimaartoqartalernissaanik isumaqatigiissuteqartoqassasoq, taamaalilluni 8. klassemi atuartut tuluttut piginnaasaat qaffassarneqarsinnaassallutik
  • Nunap immikkoortuani suliffissaaleqisut amerlassusaat ukiuni kingullerni nikissimanngillat . Sulilersitsiniarluni immikkut ittumik iliuuseqartoqarnissaa siunnersuutigineqarpoq.

Attaveqaqatigiinneq pilersuinerlu:

  • Amerlasuunit tikkuarneqarpoq Qaanaami aqquserngit inissiallu aserfallatsaaliornerat kinguartooqqasorujussuusut.
  • Assartuineq inuussutissarsiornerlu nukittorsarniarlugit umiarsualiveqarneq pitsanngorsarniarlugu nunniortoqarnissaa kissaatigineqarpoq.
  • Eqqakkanik suliaqarneup pitsanngorsarneqarnissaa suinertaralugu Qaanaami eqqakkanut ikuallaaveqalernissaa amerlasuunit tikkuarneqarpoq. 

Naalakkersuisut oqarput:

”Qaanaaliarneq pissarsiaqarnaqaaq, sumiiffimmi unammilligassat pillugit innuttaasunik ulluni marlunni atatsimeeqateqarnissamut periarfissaqartitsilluarsimasumik.

Naalakkersuisut, Qaasuitsup Kommuniata Qaanaallu illoqarfiata suleqatigiillugit isumasioqatigiinnermi isumassarsiarpassuit ingerlateqqinnissaat qilanaarivarput. Ilutigitillugu misissussavarput Qaanaami eqqaanilu aningaasaqarnikkut ineriartornermut suliffeqarnermullu ineriartortitsinissamut iluaqutaasumik siunnersuutit inerisarnissaannut qanoq periarfissaqarnersoq”.

 

Paasaqarnerorusuttut attavigisinnaavaat Naalakkersuisoqarfimmi pisortaq Søren Hald Møller mobil 54 87 83 imaluunniit Naalakkersuisoqarfimmi pisortaq Jørn Skov Nielsen mobil 556188