Great Greenlandip iluarsaqqinnissaanut pilersaarut

Great Greenland A/S ukiuni kingullerni aningaasaqarnikkut ajornartorsiuteqarpoq.

Tamatumalu kingunerisaanik suliffeqarfiuk ukiuni 2009miit 2015-imut 65 mio. kr.-nik Immikkut ittumik aningaasaliissutinik tigusaqartarpoq, ukiumilu 2015imiinnaq 15 mio. Kr.-inik immikkut aningaasaliissutinik tunineqarluni.  Immikkut aningaasaliissutit saniatigut suliffeqarfiup amminik tingooraaviinut aamma tapiissuteqartoqarpoq, ingerlatsinermut ukiumut tapiissutit katillugit 26.mio. kr-iullutik.

Tabel 1. Nunatta karsianit Great Greenlandimut ukiuni 2009-2014-mut mio.kr.-ni immikkut ittumik aningaasaliissutaasut.

2009

2010

2011

2012

2013

2014

2015

Totalt

2009 - 2015

8

12

8

12

5

5

15

65

Great Greenlandimit nunatta iluani amernik piumasaqanngissuseq ukiuni kingullerni misigineqarpoq, tassungalu ilutingalugu nunani allani tuniniaavinni aporfinnik misigisaqartarluni. Kopenhagen Furimi akitsorterussilluni amernik tuniniaasarneq 2015-imi pitsaasuunngitsumik ingerlavoq. 

Suliffeqarfimmi pissutsit 2015-mi upernaakkut ima ilungersunartigilerput, Naalakkersuisut suliffeqarfiup ingerlaannarnissaanut periarfissanik misissuisariaqarlerlutik.

Great Greenlandimut naliginnaasumik ukiumoortumik aningaasaliissutaasartut atorlugit suliffeqarfik ingerlateqqinneqarsinnaalernissaa anguniarlugu Naalakkersuisut misissuinertik tunuliaqutaralugu suliffeqarfimmi siulersuisut peqatigalugit iliuusissanik assigiinngitsunik suliniuteqalerput,

”Great Greenlandip atuutiinnarnissaa qulakkeerniarutsigut Naalakkersuisunit akisussaasunit suliniutit suliariniarneqartut pisariaqartput. Taamatut ukiumut immikkut ittunik aningaasaliissutinik tunniussisariaqartarneq attatiinnarneqarsinnaanngilaq. Piniartut puisinniartarnermik inuussutissarsiuteqarnerannik attassinissamik tunngaveqarpoq. Great Greenlandip 2015imi ukiunilu siuliini amingartooruteqarujussuarluni ingerlasimaneraniit ukioq mannamiit 2016imiit aningaasaqarnermi naatsorsuutit oqimaaqatigiilertariaqarput.Taamattumik iliuuseriniakkat annertupput, piniartut puisinniarnemrik inuussutissarsiuteqarnerata attatiinnarnissaanik anguniangaqarluni”, Inuussutissarsiornermut, Suliffeqarnermut Niuernermullu Naalakkersuisoq Randi Vestergaard Evaldsen oqarpoq. 

Naalakkersuisut suliffeqarfiup siulersuisui suleqatigalugit suliniutinik arlalinnik aallartitaqarput, suliffeqarfiup aningaasaqarnerata 2016mi oqimaaqatigiissumik inissinnissaa qulakkeerniarlugu ukiunilu aggersuni ineriartortitsinissamut tunngavissaqalersitserusullutik

Makku suliniutit taaneqarsinnaapput:

  • Aningaasartuutikillisaaneq suliffeqarfimmilu aaqqissuusseqqinneq, soorlu mersortarfinnik ingerlatsinermi ,aamma tuniniaasarfiup suliffeqarfiullu aqutsisuinik nukittorsaasoqarnissaa.
  • Tuniniaavinni saqqummersitsisarnissat aallarnisarlugit, Kalaallit Nunaanni puisip amiata piujuaannartitsineq pillugu meqqilerneqarnissaa anguniarlugu.  
  • Amminik tunitsivinni malittarisassanik allanngortitsingallarnerit.

Great Greenlandip toqqoriviani maanna natsit amii uninngasuutigineqartut, ima amerlatigaat ukiuni arfinilinni tunineqarsinnaasutut naatsorsorneqarlutik. Natsit amiinik amerlanernik tigooqqaasoqassappat, ammit suliarineqarlutillu toqqorsivinni uninngasuutigineqaannassappata  tamanna Great Greenlandip aningaasaqarneranut millionilinnik artukkiissaaq.

Taamaattumik aalajangiisoqarpoq, natsit amiinik tunitsivinnut tunisanik Qaqortumi ammerivimmi suliarineqaqqittussatut 2016-imi assartuisoqarunnaarallassasoq . Periusissat allat ajornanngillat, ammit tunitsivinnut tunineqartut erngerlugit aserorterneqassapput imaluunniit aningaasartuuteqaqqinnikkut kingorna ammit aserorterlugit. Taamatut iliuuseqarnermi Great Greenlandip toqqorsivianni natsit amii ikilisinniarneqarput.

”Isumatusaarneruvoq, 2016iugallartoq, Great Greenland toqqannanngikkaluamillu nunatta karsia amerlanerusunik aningaasartuuteqartinngikkaanni, Inuussutissarsiornermut, Suliffeqarnermut Niuernermullu Naalakkersuisoq Randi Vestergaard Evaldsen oqarpoq nagillunilu erseqqissaavoq Naalakkersuisunut pingaaruteqartuusoq piniartut natsit amiinik suli tunisisinnaanissaat, tamannami avinngarusimasuni nunaqarfinnilu  ataatsimut isigalugu inuuniarnikkut isertitaqassutigisarmassuk. 

” Isumaqarpunga  toqqorsivinni amminik amerlasuunik uninngasuutitaqarneq pissutigalugu imatut immikkut ittumik iliuuseqartariaqarneq, natsit amiinik 2016imi suliaqaqqittarunnaarallarneq  aningaasaqarnermut isumatusaarnerusoq, avatangiisitigut piujuaannartitsiniarnermut inuiaqatigiinnilu akuerineqarsinnaasoq ”., Inuussutissarsiornermut, Suliffeqarnermut Niuernermullu Naalakkersuisoq Randi Vestergaard Evaldsen oqarpoq. ” Erseqqissarusuppara, natsit amiinik suliareqqiisarunnaarallarnermi piniartut natsit amiinik tunisaqarnermikkut isertitaqarnissaannut periarfissat ajorseriarneqanngimmata

Naalakersuisut nunaqarfinni avinngarusimasunilu isertitaqartoqarsinnaaneranut periarfissaqartitserusupput. Taamaattumik tunisinermi tapiissutit tunniunneqartassapput. Ungasinnerusoq eqqarsaatigalugu pilersaarutaanngilaq natsit amiisa asorterneqartuartarnissaat. Great Greenlandimulli ukiuni kingullerni immikkut ittumik aningaasaliissuteqartoqartarnera  Naalakkersuisut akuersaaruminaatsippaat.

Great Greenlandip tusagassiuutinut nalunaarutaannut ullumi nassiunneqartumut Naalakkersuisut innersuussipputtaaq.

Paasissutissanik allanik piniaraanni saaffissaq: Helene S. Pedersen mobil. 586116