Uranimik annissuineq sillimaniarnermullu nakkutilliineq pillugit isumaqatigiissuteqarneq

Uranimik annissuinermi sillimaniarnermullu nakkutilliineq pillugit Danskit naalagaaffiallu isumaqatigiissuteqarneq

Kalaallit Nunaanni uranimik aatsitassanillu radioaktiviusunik avammut tunisinermut sillimaniarnermullu nakkutilliinermut tunngasunik Danskit naalagaaffiat Naalakkersuisullu akornanni isumaqatigiissuteqartoqarnera pillugu Inuussutissarsiornermut, Suliffeqarnermut Niuernermullu Naalakkersuisoq Randi Vestergaard Evaldsen Inatsisartuni nunanut allanut sillimaniarnermullu ataatsimiititaliamut, Inuussutissarsiornermut ataatsimiititaliamut, Aatsitassanullu Ataatsimiititaliamut ilisimatitsilluni ullumi ataatsimeeqateqarpoq, tassanilu ilanngullugu aatsitassanik suliassaqarfimmi piginnaasaqarnermut tunngasunik ilisimatitsisoqarpoq.

Isumaqatigiissutitigut Danmarkip aamma Kalaallit Nunaata akornanni piviusumik suleqatigiinneq pinngortinneqassaaq, taassuma Kalaallit Nunaata aatsitassarsiortoqarnerup annertusarnissaanik ilungersuutigisaminik nangitsisinnaanera qulakkiissallugu, tamannalu ilutigalugu Kunngeqarfiup nunat tamalaani pisussaaffigisaminik naapertuutsitaqarlunilu nunat tamalaani najoqqutassiat sakkortunerpaat naapertuutsissallugit.

”Isumaqatigiissutit ataatsimut isigalugit qulakkiissavaat, saniatigooralugu uranimik piiaanissamik akuersissummik kingusinnerusukkut tunniussisoqassagaluarpat Kalaallit Nunaannit uranip taamaallaat sorsunnerunngitsumut inuiaqatigiinnullu siunertanut atorneqarnissaat. Suliaq Danmarkip aamma Kalaallit Nunaata akornanni pitsaasumik kinguneqartitaasumillu suleqatigiinnermi sukumiisupilussuarmik piareersarneqarsimavoq, 2013-imilu urani pillugu nalunaarusiami ataatsimoorussatut innersuussutigineqartunik aallaaveqarpoq”, Inuussutissarsiornermut, Suliffeqarnermut Niuernermullu Naalakkersuisoq Randi Vestergaard Evaldsen oqarpoq.

Uranimik piiaallunilu avammut tunisinermut atasutut immikkut ittutut nunanut allanut, illersornissamut sillimaniarnermullu politikkikkut pissutsit pillugit Danmarkip aamma Kalaallit Nunaata qanoq suleqatigiinnissaannut ataatsimoorussatut sinaakkutissamik aalajangersaasumik isumaqatigiissutaaffinnik Naalakkersuisut aamma danskini naalakkersuisut isumaqatiginnipput. Tassaavoq danskit aamma kalaallit oqartussaaffeqarfiisa akornanni akisussaaffittut suliassaqarfinnik suliassanillu agguataarinernik naalagaaffiup iluani atuuttutut piginnaasanik agguataarinermik aallaaveqartumik paatsuugassaanngitsumik erseqqissaasutut isumaqatigiissutaaffiusoq.

Danskit naalagaaffiat Folketingemut inatsisissatut siunnersuutinik 2016-imi upernaami isumannaallisaanermik nakkutilliineq aamma avammut tunisinermut nakkitillineq pillugit saqqummiussiniarpoq. Tamanna ilutigalugu Inatsisissatut siunnersuutit Inatsisartut isummerfigisassaattut 2016-imi upernaakkut ataatsimiinnermi malittarisassiat malillugit saqqummiunneqassapput.

Atomip nukinganik suliassaqarfimmi nunat tamalaani isumaqatigiissutinut arfinilinnut Kalaallit Nunaannut tunngatillugu naalagaaffimmut killilersuinerup atorunnaarsinnissaanik kissaateqarneq pillugu 2013-imit urani pillugu nalunaarusiaq tunngavigalugu Inatsisartut aalajangiussisimapput. Suliassaqarfimmissaaq tassani nunat tamalaani isumaqatigiissutini taakkunani pisussaaffigisanut Kalaallit Nunaata naapertuutsitsinissanut suliassat pisariaqartut misissoqqissaarnissaat pillugit Danmarkip aamma Kalaallit Nunaata akornanni qanimut suleqatigiittoqarsimavoq, taamaalillutik Kalaallit Nunaannut naalagaaffimmut killilersuutaasut taakku atorunnaarsinneqarsinnaassammata.

 

Annerusumik oqaaseqartitsiniaraanni, attavissaq Inuussutissarsiornermut, Suliffeqarnermut Niuermullu Naalakkersuisup allattaa Helene S. Petersen telefon: 34 56 06