"Meeqqat nerisallu" 2016-imi isiginiarneqarnerat

Illit ilaquttatillu peqqinnarnerusumik nerisaqarnissassinnut isumassarsiorfissanik amigaateqarpisi? Taava nerisat pillugit ukioq suliniarfiusoq atorluarsiuk ilaqutariittullu peqqinnarnerusumik ileqqoqalernissassinnut aallarniutigalugu.

Innuttaasut peqqissuunissaannut periusissiami Inuuneritta II-mi 2016 nerisat pillugit ukiutut suliniarfiusussatut toqqarneqarsimavoq. Nerisavut peqqissuunitsinnut ilorrisimaarnitsinnullu pingaarutilerujussuupput, peqqinnartumillu ileqqoqalernissaq meeraanermit tunngavilerneqaruni pitsaanerpaalluni. "Meeqqat nerisallu" qulequtaralugit ukiup ingerlanerani peqqinnartunik nerisaqarnermik immikkut isiginiagaqarluni pingaartumik ilaqutariinnut sammisitanik meeqqanullu toqqaannartumik sammisitanik suliniutinik arlalinnik ingerlatsisoqassaaq.

-”2016-imi ataatsimoorluni illinnartunik peqqinnartunillu nerisassioqatigiinnerup nuannissusia isiginiarneqassaaq. Nunatta pissarititai atorlugit peqqinnartunik qanoq nerisassiortoqarsinnaaneranik ilitsersuerusuppugut, matumanilu pingaartumik aalisagaq isiginiarusupparput, nunatta pissarititaa pitsaalluinnartoq," Naalakkersuisoq Doris Jakobsen oqarpoq nangillunilu:

-”Neriuppunga, ukioq suliniuteqarfiusoq ilaqutariinnut peqqinnartunik nerisaqarneq pissusissamisoortutut toqqassagaat angerlarsimaffimminnilu taamatut tunaartaqassasut. Nerisassat timimut qaratsamullu inuussutissaannaanngillat pingaarutillit, inooqatigiinnitsinnulli pingaarutilerujussuupput. Kalaallit nerinermut kulturiat inoqatigiit ataatsimoorfiattut atorneqartuarsimavoq. Kingornussaq tamanna pingaaruteqarpoq, meeqqatsinnut ingerlateqqittariaqartoq.”

Nerisat pillugit ukiorititami suliniutit Nerisaqarnermut Timigissarnermullu Siunnersuisoqatigiit nerisat pillugit inassuteqaataannit aallaaveqarput: ”Nerisat pillugit siunnersuutinik qulinik" nutaannguallatsitsisussat. Meeqqat suli atualinngitsut immikkut isiginiarlugit nerisanut nerisaqartitsinermullu politikkip immikkoortortaqarfinnit assigiinngitsunit suleqateqarluni suliarineqarnissaa isiginiarneqarpoq.

Meeqqanut illinnartumik nerisassiornissamut ilitsersuummik pitsaanerpaamik unammisitsinissaq aamma meeqqanut qilanaarnassaqqooqaaq. Meeqqanut iganermut ilitsersuutinik ukiup kingusinnerusuani atuakkiortoqarnissaa pilersaarutigineqarpoq aamma suliniutip aallarnisaataasup "Meeqqanut nerisassiornermik atuarfik" aallartinneqassaaq. Aamma quppersakkap nuannarineqarluartup "Meeraaqqanut 0-3-nik ukiulinnut nerisassat" naqiteqqinnissaa pilersaarutigineqarpoq.

Inuuneritta II pillugu aamma nerisat pillugit anguniagaasut www.peqqik.gl-imi atuakkit.

 

Paasisaqarnerorusukkuit Naalakkersuisup allattaa Rosa Thorsen mobilikkut: +299 55 33 03-ikkut imaluunniit e-mailikkut: rosat@nanoq.gl-ikkut attavigiuk.