Qaanaami innuttaasunik ataatsimiititsineq ulloq 20. januaari

Naalakkersuisut Siulittaasuat, Naalakkersuisunut ilaasortat arfinillit Qaasuitsullu Kommunia Qaanaami eqqaanilu innuttaasunik Timersortarfimmut pingasunngornermi 20. januaari nal. 15 – 18 ataatsimiigiaqqusipput, Qaanaami eqqaanilu inuussutissarsiornermi suliffeqarnermilu unammilligassat oqaluuseriniarlugit.

Naalakkersuisut taamak amerlatigalutik Qaanaami innuttaasut inuussutissarsiornermik ineriartortitsineq, ilinniartitaaneq, ineqarneq, attaveqaqatigiinneq, avatangiisit, aalisarneq piniarnerlu pillugit isumaat tusariartorlugit ornigussinnaagamik Naalakkersuisut iluarisimaarpaat.

Qaasuitsup Kommunia suleqatigalugu naalakkersuisoqarfinni suliassaqarfiit akimorlugit ataatsimoortumik sumiiffimmi pisariaqartinneqaqisunik aaqqiissutissarsiornissaq Naalakkersuisut pisariaqartippaat. Citronen Fjordimi aatsitassarsiornissamut suliniut pillugu immikkut aamma tusagaqartoqarsinnaassaaq, Naalakkersuisut, Naalakkersuisut siunnersortaat aatsitassarsiorfiullu aallartitaat apeqquteqarfigineqarsinnaassallutik.

Ulloq 20. januaari innuttaasunik ataatsimiititsineq inuussutissarsiorneq sulisoqarnerlu pillugu ulloq 21. januaari isumasioqatigiinnissamut tunngaviussaaq, isumasioqatigiinnermi sulisoqarnermik inuussutissarsiornermillu suliaqartut peqataassallutik. Nunap immikkoortuani unammilligassat iliuuseqarfigineqarnissaannut eqqartuisoqassaaq. Aallartisaaneq, takornariaqarneq, sulisoqarneq, ilinniartitaaneq, aalisarneq, piniarneq, attaveqaqatigiinneq pilersuinerlu immikkut sammineqassapput.

Ulloq: pingasunngornermi 20. januaari
Piffissaa: nal. 15.00 – 18.00
Sumi: Timersortarfik, Qaanaaq