Kalaallit Nunaata Sinniisoqarfia maannakkut Canada-mut piginnaatitaaffeqalerpoq

USA-mi Kalaallit Nunaata Sinniisoqarfia maannakkut aamma Canada-mut piginnaatitaaffeqalerpoq. Piginnaatitaaffeqalernerup kingunerisaanik suliassaqarfiit USA-p saniatigut maannakkut aamma Canada-mut tunngassuteqalissapput. Canada-mut tikeraarneq siulleq Kalaallit Nunaata aallartitaanit sapaatip akunnerata siuliani ingerlanneqarpoq.

Tikeraarnermi Kalaallit Nunaata aallartitaata suleqatigisartakkanut taamatullu suleqatigiligassanut pisortatigoortumik ilisaritinnissaa siunertarineqarpoq. Kalaallit Nunaata aallartitaata atorfilittat nunanut allanut ministereqarfimmi Canadamiut naalakkersuisuineersut naapeqatigai aammalu Inuit Tapiriit Kanatami siulittaasortaavat, nunanut allanut attaveqarnernut canadami aalisarnermut naalakkersuisoqarfimmi pisortaq, danskit Iqaluit-nni konsuliat aamma EU-p Canada-mi aallartitai ilassineqarlutik.

Canadamiut tungaanniit Nunavut aamma Kalaallit Nunaat pillugit suliassaqarfiit ataatsimoorussamik soqutigisaqarfiusinnaasut arlallit iluanni qaninnerusumik suleqatigiinnissaq kissaatigineqarpoq, tassani puisit amiinut tunngatillugu EU-mut inuit ilaatinneqannginnerisa iluanni qaninnerusumik suleqatigiinnissaq ilaatinneqarluni. Kalaallit tungaanniit Ottawa-mut tikeraarneq qaammatit tulliuttut iluanni, suleqatigiinnerup qanoq iliornikkut ineriartortinneqarsinnaanerata oqallisiginissaa siunertaralugu, Iqaluit-nnut tikeraarnermik malitseqartinneqarniarpoq. Kisianni aamma nunap immikkoortui Atlantikumut killeqarfeqartut, Kalaallit Nunaannut niuernermik tunngaveqartumik aammalu aningaasaqarnikkut soqutigisaqarfinnik misissuiffigissallugit soqutiginaateqarfiusinnaasut, sammineqassapput.

Naalakkersuisunut ilaasortaq Aningaasaqarnermut, Aatsitassanut Nunanullu Allanut akisussaasuusoq Vittus Qujaukitsoq oqarpoq:

”Washington D.C.-imi Kalaallit Nunaata Sinniisoqarfia 2014-imili kalaallit aamma amerikamiut soqutigisaqartut akornanni akunnermiliuttutut attaveqaatitullu pingaaruteqartumik inissisimasimavoq. Suleqatigiinneq maannakkut aamma Canada ilaalersillugu annertusineqarpoq. Tamanna Davis-ip Ikersua akimorlugu suleqatigiinnerup ineriartortinneqarnissaanik annertuumik suliniuteqarfiusariaqarsimavoq. 2017-imiit Washington D.C.-imi Sinniisoqarfik tamakkiisumik sulisoqalissasoq naatsorsuutigineqarpoq.

Kalaallit Nunaanni Danmarkimeersut kisiisa sammiinnarnagit atitunerusumik eqqarsarsinnaassuseqaraanni, kisiannili aamma amerikap avannarliup tungaaniit Kalaallit Nunaannut suut iluaqutaasinnaanersut qimerlooraanni, Amerikap avannarliup aamma Kalaallit Nunaata akornanni qaninnerusumik suleqatigiinnissamut periarfissaqarfiusut annertoorujussuupput. Kalaallit Nunaanni ineriartortitsinermut aamma inuussutissarsiornermi periarfissanut soqutiginninneq Canada-mi annertoorujussuuvoq. Ineriartortitsinikkut Kalaallit Nunaat tunngaviusuni arlalinni siuarsimaneruvoq, taamaattumillu aamma Kalaallit Nunaat qanoq qanorlu iliorluni ilinniartitaanikkut, aningaasaqarnikkut, niuernermik tunngaveqartumik politikkikkullu ineriartortitsisimanersoq amerikap avannarliup tungaaniit isumassarsiorfissatut periarfissaqarfiusutut isigineqarpoq.”


Annertunerusunik paasissutissanik piniarnermi attaveqarfigineqassapput: Nunanut Allanut Pisortaqarfimmi pisortaq Kai Holst Andersen +45 40 17 82 93 / Sinniisoqarfimmi pisortaq Inuuteq Holm Olsen +1 202 431 1660