”Naalakkersuisut uuliamut quaapput”-mut oqaaseqaat

Sermitsiap internetsikkut nittartagaani 15. januar 2016-imi allaaserisaq qulaani allassimasutut qule­qutalik atuarneqarsinnaavoq. Allaaserisami allassimavoq Naalakkersuisut ikummatissat pillugit po­litikkiat paasiuminaatsuusoq. Allaaserisaq atuarlugu oqarusunnangajassinnaavoq Sermitsiap isumai aamma paasiuminartuaannanngitsut. Kisianni pisimasut matumuuna paasiuminarsarniaraluassavak­ka.

Allaaserisami oqaatigineqartutuut ilumoorluinnarpoq Aningaasaqarnermut Naalakkersuisuusima­soq, ikummatissat akitsuutaasa qaffanneqarnissaannik siunnersuummik 2015-imi ukiakkut saqqum­miussaqartoq.

Aamma ilumoorpoq uanga sapaatip akunnerini kingullerni siunnersuutigisarakku, Polaroilip uuliap akii pilertornerusumik appartittariaqaraluarai, nunarsuarmilu uuliap akiisa appariartornerat taamaa­liornermigut Nunatsinni atuisunut malugitillugu.

Tassuunakkummi arlaannik akerleriittoqanngila? Aap, taamaattoqanngilaq. Allaat paarlattuanik pi­soqarpoq!

Tassami imaappoq, Naalakkersuisuusimasup siunnersuutigimmagu ikummatissat akitsuutaat, uuliap akiisa appariartulernerat ilutigalugu aatsaat qaffakkumaartut, atuisut uuliap akiisa apparnerat taa­maalillutik malugissammassuk, kisiannili uuliap akiisa naatsorsuutigisatut appariaataattut angitigi­sumiunngitsoq. Tassa imaappoq uuliap akivii atuisunut ataasiakkaanut qaffanneqarnissaat – siusin­nerusukkut maannakkulluunniit pineqarsimanngisaannarpoq. Siunnersuutaaqqaartoq Landskarsip isertitassaasut pisariaqartinneqartunik qulakkeerinissamik pissuteqaraluarpoq – naluneqanngitsu­tuulli ajornartorsiut taannarpiaq allatut aaqqiivigineqarpoq, tassami aningaasanut inatsisissap isuma­qatigiinniutigineqarnerani partiit naalakkersuisooqatigiissut sapiillisaarnermikkut iliuuseqarumassu­seqarnermikkullu, Landskarsip isertitassaasut pisariaqartinneqartut sipaaruteqarnikkut isertitassati­gullu allatigut qulakkeermatigik.

Tassa imaappoq siunnersuutaaqqaartumi naatsorsuutigineqaqqaaraluarpoq uuliap akii appariangaat­siartussaasut. Naatsorsuutiginninnerlu taannarpiaq uanga aamma piffissami kingullermi oqaatigisar­para. Uangaliuna uuliap akii Polaroilip maannamut appaasimaneranit pilertornerusumik apparneqar­nissaat kissaatiginartuusoq oqaatigiinnariga.

Tamaattumik naalakkersuisooqatigiit politikkianni akerleriissunik pisoqanngilaq. Paarlattuanilli pi­sariaqartumik piviusorsiorneruvoq.

 

Inussiarsumik inuulluaqqusillunga

Vittus Qujaukitsoq

Aningaasaqarnermut, Aatsitassanut Nunanullu Allanut Naalakkersuisoq