Umiatsiaararsorlutik aalisartuusimasut aalisartunngoqqissinnaapput

Stemningsbillede

Naalakkersuisut aalajangerput aalisartut 2012-ip siornatigut inuussutissarsiutigalugu aalisartuusimasut immikkut akuersissuteqartitsilluni aalisartunngoqqissinnaasut. Aalisarnermi aalisarsinnaanermut akuersissutit pisassiissutillu pillugit nalunaarummi nr. 9, 17. juli 2014-imeersumi paragraf 5, immikkoortoq 2 naapertorlugu immikkut akuersisoqarsinnaalluni.

Immikkut akuersissut atuutissaaq aalisarsinnaanermut akuersissutit pisassiissutillu pillugit nalunaarutip nutaap 2016-imi februaarimi atuutilernissaata tungaanut.

Aalajangersakkamit pineqartumit immikkut akuersissuteqarsinnaaneq taamaallaat inunnut aalisarnermik inuussutissarsiuteqartunut 2012 sioqqullugu aalisarsinnaanermut akuersissutinik annaasaqarsimasunut aamma aalisarnermik inuussutissarsiuteqartunut ukiup siuliini akuersissummik atuisimanngitsunut tunniunneqassaaq, soorlu assersuutigalugu umiiarnermik, napparsimanermik, ilinniarnermik imaluunniit tunitsivissaqarsimannginnermik pissuteqartumik. Taakku aalisaqqilernissaminnut periarfissaqalerlutik.

Inuit 100-t missaanniittut umiatsiaararsorlutik aalisaqqilernissaat naatsorsuutigineqarpoq. Aalisaleqqilertussat amerlanersaat avannaaniipput, aqutsiveqarfinni pingasuusuni Upernavimmi, Uummannami aamma Qeqertarsuup Tunuani amerlaqatigiingajapput.
Umiatsiaararsortut akuersissutillit maannakkut 820-iupput. Nunatsinni umiatsiaararsorlutik aalisarnermik inuussutissarsiuteqartut 1.200-t, umiatsiaaqqamik aalisarsinnaanerminnut akuersissuteqarput.

Aalisartut immersuiffissaq immersoriarlugu Aalisarnermut, Piniarnermut Nunalerinermullu Naalakkersuisoqarfimmut nassiussinnaavaat, uunga aalisa@nanoq.gl

Qinnuteqarfissaq inuussutissarsiutit pillugit nittartakkami imaluunniit Sullissiviup nittargaani, Sullissivik.gl

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi allaffimmi pisortaq, Jóhanna Lava Køtlum. Mail: jool@nanoq.gl