Qilalukkat pillugit nalunaarut nutaaq 15. januar 2016

Ulloq 14. januar 2016 Naalakkersuisut akuersissutigaat qilalukkanik qaqortanik qernertanillu illersuineq piniarnerlu pillugit nalunaarutip teknikkikkut allannguuteqarnissaa.

Nalunaarummi ilanngussaq 1-imi allannguutit makkua ilaapput:

a)    § 4 aamma § 5 peerneqarpoq taanna qilalukkanik qaqortanik qernertanillu pisassiissutinik aalajangersaasarnermut tunngavoq.

b)    Taamattumik §§ 4-5-imullu taarsiullugit § 3, imm. 3 ilassutigineqarpoq qilalugaqaqatigiiaat killeqarfiinik killiliinernut tunngaviusunut tunngasoq, kiisalu § 3, imm. 6-ip ilanngunneqarnera qilalugaqatigiit killeqarfiinik killiliineq aamma piniarfinnik aalajangersaaneq pillugu tamanut ammasumik nalunaaruteqartarneq.

c)    Allannguut annikinnerusoq tassaavoq nalunaarummi nutaami § 7, imm. 2-mi  “kommune” taarserneqarmat “aqutsiveqarfik”-mik taarserneqarluni.

d)    § 8, imm. 3-tut nutaami allannguut annikinnerusoq tassaavoq “qilalugaqatigiinniit” taarserneqarmat “sumiiffimmiit”-mik)

e)    Kalaallisoortaani § 22-mi oqaatsit atorneqartut ilaat aaqqiivigineqarput.

 

Qilalukkanik qaqortanik qernertanillu illersuineq piniarnerlu pillugit nalunaarummut allannguutit nassuiaatigineri.

1a) Allannguutit teknikkikkut allannguutaapput. Tamanna imatut paasineqassaaq allannguutit innuttaasunut ingammik piniartunut pitsaanngitsumik kinguneqassanngitsut, pisassiissutinut, piniariaatsinut assigisaanullu.

1b) Allannguineq piviusumik isumaqassaaq ingerlatsiviup uumassusilerisunit siunnersuineq nutaanerpaaq aallaavigalugu pisassiissutit ajornannginnerusumik aalajangersarsinnaanngorai.

1c) Nalunaarutaasimasup imaa, sumiiffiit qilalugarniarfiusinnaasut allorniusat tukimukartut sanimukartullu atorlugit nassuiarneqarput. Tamanna isumaqarpoq uumassusilerisut qilalukkat sumiiffinni ingerlaartarneri kiisalu uninngaartarfii pillugit paasisanik nutaanik peqartillugit, nalunaarut taava tamatigut allanngortittariaqartassaaq, tamannalu ukiunik marlunnik akunneqarsinnaasarpoq. Allanngortinneqanngippat nalunaarut amigaateqalissaaq nutarterneqarnissaatalu tungaanut naammaginanngitsumik inissisimassalluni.

1d) Nalunaarummi §§ 4-5 peerneqarneratigut, nalunaarummilu § 3, imm. 3-p aamma imm. 6-p oqaasertai allanngortinneratigut ingerlatsiviup piniarfiusunik allanngortitsisinnaaneq qulakkeerneqassaaq, pisarissersuutaanngitsumik nalunaarummillu tamatigut nutarterinermik suleriuseq sivisusinnaasoq eqqarsaatiginagu.

1e) Siunnersuineq nutaaq APNN-ip NAMMCO* aamma JCNB**-p JWG-ianit (Ataatsimoorussamik Suleqatigiissitaq) tigusimasaa naapertorlugu ilaatigut Kitaani qilalukkanut qernertanut pisassiissutit ukiumut 100-t sinnerlugit qaaffaasinnaanermik kinguneqassaaq.

Qilalukkat qaqortat qernertallu piniagaapput Kalaallit Nunaata annersaanut pingaaruteqarluinnartut. Piniarneq pisassiissutit atorlugit nalunaarutikkullu 2004-miit killilersorneqalermalli pisaasartut annertussusaat, piniariaaseq iluaquteqarnerlu allannguuteqarsimapput. Pisortatigut aqutsisut ilisimasaat annertusiartugaaginnarsimavoq ilaatigut biologinit atuisunillu siunnersorneqartarnikkut. Uumassusilerisunit siunnersuineq kingusinnerpaami sumiiffimmi taaguutit aamma isummap imarisai allat atorneqarput, ilaatigut Kalaallit Nunaata imartaani qilalugaqaqatigiiaanut tunngasut, maannakkut nalunaarummut naapertuutinngitsut. Aammattaaq piniarfimmik nutaarluinnarmik Kalaallit Nunaata Avannaata-kitaani (Etah) ilanngussisoqarpoq. Taamaattumik inissaminiippoq teknikkikkut aaqqiinissamik.

 

Qilalukkanik qaqortanik qernertanillu illersuineq piniarnerlu pillugit  Namminersorlutik Oqartussat nalunaarutaat nr. 1, 15. januar 2016-imeersoq.

 

Sukumiinerusumik paasisaqarusukkaanni attavigisassaq:

Immikkoortortami pisortaq Amalie Jessen, tlf: 34 53 04, e-mail: amalie@nanoq.gl