Naligiissitaaneq pillugu suleqatigiinnissaq

Ilaqutariinnermut, Naligiissitaanermut Isumaginninnermullu Naalakkersuisup Martha Ludn Olsen-ip siullermeersumik Danmarkimi Meeqqanut, Ilinniartitaanermut Naligiissitaanermullu Ministeri Ellen Trane Nørby, ulloq 12. januar 2016-mi, Folketing-imi ataatsimeeqatigisimavaa.

Naalakkersuisut akunnerminni paasissutissanik ingerlatitseqqipput, marluullutillu unammilligassanik iliuuseqaatinillu ilisimatitseqatigiillutik. Ilaatigut aamma najugaqarfinni arnat angutillu naligiinngitsumik amerlassuseqaleriartornerat aammalu qanigisariit akornanni annersaasarnerit eqqartuiffigineqarlutik.

Ellen Trane Nørby nunatsinni politikkikkut ataavartumik siunnerfeqartumillu iliuuseqarniarsimanerat nersualaarinnissutigivaa aammalu Nuummi suiaassuseq, ilinniartitaaneq innuttaasullu nikikkiartornerat pillugit Nunani Avannarlerni isumasioqatigiissitsinerup piareersarneqarluarsimanera nersualaarinnissutigalugu.

Ilanngullugu Ellen Trane Nørby oqaluttuarivaa Nunani Avannarlerni suleqatigiinnikkut nuanniilliortitsisarneq iliuuseqarfiginiarneqalersimammat, tamatumanilu nammineerluni ”inuiaqatigiinni periutsit ineriartornerat” immikkut isiginiagarinerarlugu. Tamannami aamma Europami aalassatsitserujussuarluni pisut pisariaqartilermassuk.

Martha Lund Olsen-ip ilaatigut oqaluttuarivaa Nunatsinni nuanniilliortitsisarneq aammalu aappariilerlaat akornanni annersaasoqartarnera suliniuteqarfigineqalereersimammat, ilaatigullu tamanna Naligiissitaanermut Siunnersuisoqatigiit nunatsinni sulinerannut ilaatinneqarmat, neriuutigineqarlunilu taamaasilluni nunarput Nunani Avannarlerni suliniuteqarnermut ilapittuuteqarsinnaajumaartoq.

Ataatsimeereernerup kingorna Martha Lund Olsen-i imatut oqaaseqarpoq: ”Nuannaarutigeqaara danmarkimi suleqatigisannik naapeqateqarsinnaasimanera aammalu takutissinnaagatsigu Nunatsinnit tigussaassunik ilisimatitsisinnaalluta” nangillunilu ”tulluusimaarutiginngitsoorsinnaanngilara Naalakkersuisoqarfimma naligiissitaanerup aqqani annertuumik suliniuteqarsimanera taamak nersualaarneqartigisinnaammat”

Annertunerusumik paasisaqarusukkuit attaveqarfigisinnaavat: Naalakkersuisup allattaa Hanne Nielsen + 299 539371