Kommune Kujalleq sukumiisumik nakkutigineqarunnaarpoq

Kommunip aningaasaqarniarnera massakkut iluarsivoq, Aningaasaqarnermullu, Aatsitassanut Nunanullu Allanut Naalakkersuisoq Vittus Qujaukitsoq aalajangerpoq kommunip sukumiisumik nakkutigineqarnera unissasoq.

Kommune Kujalleq 2014-imiilli aningaasaqarnermut naalakkersuisoqarfimmiit sukumiisumik nakkutigineqalerpoq.  Tamatumunngalu pissutaasimavoq aningaasaqarnerlunneq ajortumillu akiliisinnaassuseqarneq, nunattalu karsianit taarsigassarsiarisimasat akilersornissaat pillugu isumaqatigiissutaasumik eqqortitsisimannginneq.

”Nuannaarutigeqaara Kommune Kujalleq aningaasaqarnerminik iluarsiinialersimammat.  Kommuni imaannaanngitsunik nalaataqarsimavoq, suliassartilli pimoorussimavaat, ukiunilu tulliuttuni ajunngitsumik ineriartortoqalissasoq ilimagilluinnarpara," Aningaasaqarnermut, Aatsitassanut Nunanullu Allanut Naalakkersuisoq Vittus Qujaukitsoq oqarpoq.

Aningaasaqarneq iluarsiiffiginiarlugu Kommune Kujalleq kommunimi suliassat tamarmik suliarineqarsinnaasunik suliarisariaqakkanillu agguaasimavoq.  Missingersuutit pillugit isumaqatigiinniarnerit tassuuna oqinnerulersimapput, kommunimilu aqutsisutut sulisut ilaatigut ikilisinneqarsimallutik.  Tamakku saniatigut kommuni nalimmassaanerit avataasiorlunilu saarullittassanik tulaassisussaatitaanerit aqqutigalugit isertitaqarnerulersimavoq.'

”Suleqatigiilluta aningaasaqarnerput illuanut saatissinnaasimavarput.  Sipaarniarfiusussat aaqqissuussaanikkullu allannguinerit kisiisa aqqutiginagit, kisiannili aamma aalisakkanik suliffissuarni sanaartortitsinernilu ataasiakkaani iluanaarutit annertusarnissaat isiginiarnerunerisigut.  Tamatumunnga peqatigitillugu kommunimi aningaasartuutit aalajangersimasut allanngorartullu ikinnerulersissimavagut.  Naalakkersuisut paasinnilluarsimapput nunatsinni pisortat suliassaasigut akileraarutitigut isertinneqartut aqqutigalugit nalimmassaanermut aaqqissuussinermik naleqqunnerusumik pilersitsinissaminnut.” borgmester Jørgen Wæver Johansen oqarpoq.

”Nuannaarutigaarput taamatut sukumiinerusumik nakkutiginninneq kommunip aaqqissuussaanerata naleqqussarnissaanut, aningaasaqarnerullu ilungersunartumik pisariaqartumilli sukateriffigineqarsimanera iluaqutaasimammat,” Aningaasaqarnermut, Aatsitassanut Nunanullu Allanut Naalakkersuisoq Vittus Qujaukitsoq oqarpoq.

Qaasuitsup Kommunia taamaalilluni kisiartaalluni suli sukumiisumik nakkutigineqarpoq.

 

Attaveqarfissaq: Nauja Møller, naalakkersuisumut allatsi +299 54 41 42 imal. Jørgen Wæver Johansen, Kommune Kujallermi borgmesteri +299 55 96 72