Ikummatissat imerpalasut akiisa allanngoriartorneri

5. januar 2016-imit atuutilersumik ikummatissat imerpalasut akiisa literikkaamut 27 øremik appartinnissaat pillugit KNI-mit ilisimatitsissummik Naalakkersuisut tigusaqarsimapput.

Piffissami 2012-imit 2016 ilanngullugu ikummatissat imerpalasut pilersuutigineri pillugit Namminersorlutik Oqartussat aamma KNI’p akornanni kiffartuussinissamik isumaqatigiissut atuuttoq malillugu akinik appartitsisoqarpoq.

Kiffartuussinissamik isumaqatigiissut malillugu ikummatissat imerpalasut niuerutiginerinut akigititat kiffartuussinissamik isumaqatigiissummut atasutut isertitat aningaasartuutillu tunngavigalugit naatsorsorneqassapput. Aamma akit sapinngisamik appasinnerpaasinnaaffianut aalajangerneqartassanerat malitsigisaavoq. Taamaattorli piffissami 2012-imit 2016 ilanngullugu ingerlatseqatigiiffiup sinneqartooruteqarnissaa isumaqatigiissutaasimavoq, sinneqartoorutit piffissami, kiffartuussinissamik isumaqatigiissuteqarfiusup atulerfiata nalaani, tankeqarfinni aserfallatsaaliuinissamik suliarisassanut amigaataasunut naleqqiullugu kivitsisoqarnissaanik periarfissiissallutik.

Ukiuni siulianisuulli KNI A/S Polaroil 2016-imi pisiarisassanut uuliamut akuiagaanngitsumut aalajangersimasunik akeqartitanut isumaqatigiissuteqarsimavoq.

Ilanngullugu 2016-imi nunatsinni inoqutigiit aningaasartuutigisaatigut koruunit 34 mio.-it tikingajallugit oqilisaaffiginissaannik akinik appartitsinerup nassataqartitsinissaa KNI’p ilisimatitsissutigaa.

Ikummatissat akiisa appartinneqarneri, aammalu 2014-imi ukiaaneraniilli Polaroil’ip akigititai literikkaanut katillugit 72 ørenik appartinneqarsimanerat Naalakkersuisut tusaatissatut tiguaat.

Taamaattumik Aningaasaqarnermut, Aatsitassanut Nunanullu Allanut Naalakkersuisup saqqummiussimasaatut nunarsuarmi akigititat pissami tassani taamaattoq appariangaatsiarsimapput.

Taamaattumik ikummatissat pilersuutigineri pillugit KNI/Polaroil’ilu kiffartuussinissamik isumaqatigiissutaajumaartussanik isumaqatiginninniarnermut atatillugu ikummatissanut imerpalasunut atuisartunut akitigitat suli annikilliseqqinnissaat Naalakkersuisut samminiarpaat, taamaalilluni ukiuni kingulliunerusuni pisimasutut nunat tamalaani uuliamut akigititani malunnartumik annikilleriaammik atuisartut suli annertunerusumik iluaquteqarsinnaalersillugit.

 

Erseqqinnerusumik ilisimatitsissutit pillugit naalakkersuisup allattaa Helene S. Pedersen, oqarasuaat angallattagaq 58 61 16-ikkut attavigiuk.