Polar Oilip akinik nalimmassaaniarnera Naalakkersuisut akuerinikuunngilaat

Ullumikkut januaarip tallimaani 2016 Polar Oil uuliap akiinik nalimmassaaniarluni nalunaaruteqarpoq tassani annikitsuaqqamik appaalaarnissaq oqariartuutigineqarluni.

Aningaasaqarnermut Aatsitassanut Nunanullu Allanut Naalakkersuisoq ima oqaaseqarpoq:

"Polar Oil-ip taama annikitsigisumik appaaniarnerarluni ilimasaaruteqarnera tupaallaatigalugulu pakatsissutigaara.

Uuliap akiisa aalajangersarneqarnerannut apeqqut ima pingaaruteqartigaaq minnerpaamik Naalakkersuisunut aalajangigassanngortillugu ingerlatinneqarsimasariaqarluarpoq.  

Aalajangerneq inuiaqatigiinnut ima annertutigisumik sunniuteqartussaasoq politikkikkut akuutitsinani aalajangerneqartariaqanngikkaluarpoq."

Nunarsuarmi uuliap akiata nikerarnera eqqarsaatigalugu Polar Oil-ip akinik nalimmassaaniarluni ilimasaaruteqarnera eqqoqqissaartuunngilaq, taamaattumillu Aningaasaqarnermut Aatsitassanut Nunanullu Allanut Naalakkersuisoq piumasaqarpoq akinik nalimmassaarinissamut ilimasaaruteqarneq tunuartinneqassasoq, aalajangernissarlu politikkikkut aalajangiivigineqaqqullugu ingerlateqqinneqassasoq. 


Paasisaqarnerorusukkaanni attaveqarfigineqarsinnaavoq Naalakkersuisumut allatsi Nauja Møller oqarasuaat +299 544142.