Nunatsinnut Ruslandimullu aalisagartassiissutit allannguuteqanngillat

Trawler

Nunarput Ruslandimik 2016-imut aalisarnissamut isumaqatigiissuteqarpoq

Russit qaleralittassaat suluppaagassartassaallu ukioq maannamut sanilliullugit allannguuteqanngillat.

Nunatsinnut saarullittassiissutit, misaqqarnartassat raajartassallu aamma ukioq maannamut sanilliullugit allannguuteqanngillat, naak biologit aalisakkanut innersuussutaat ikileriaraluartut, taamaalilluni nunatsinneersut Ruslandip imartaani 2016-imi saarullittassaat 5.100 tonsiussapput.

Aalisartut nunatsinneersut Ruslandip imartaani russillu aalisartui nunatta imartaani 2016-imi aalisarsinnaaneri isumaqatigiissummi tunngavissinneqarput.
Inuussutissarsiortunit aallartitat Naalakkersuisoqarfimmeersullu naliliipput isumaqatigiissut nunatsinnut Ruslandimullu naleqaqisoq, 2016-imullu pisassiissuteqarneq naammagisimaarnartoq, akit naapertorlugit.
Kalaallit Nunaata Ruslandimik aalisarnermut isumaqatigiissutaa marsip arfineq aappaanni 1992-mi isumaqatigiissut tunngavigineqarpoq.

Nunatta Ruslandimik 2016-imut aalisarneq pillugu isumaqatiginninniarnera, atorfilittanit Københavnimi novembarip 30-annit decembarip aallaqqaataanut 2015-imi isumaqatiginninniutigineqarpoq.
Aalisarnermut, Piniarnermut Nunalerinermullu Naalakkersuisoqarfik nunatta imartaani Ruslandillu imartaani 2016-imut aalisarnissamut decembarip aallaqqaataani 2015-imi isumaqatigiissuteqartuuvoq.
Ataani takuneqarsinnaapput 2016-imut isumaqatigiissummut nalunaarsuiffik, kiisalu ukiuni siusinnerusuni pisassiissutaasimasut:



Paasissutissat pillugit attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi immikkoortortami pisortaq, Emanuel Rosing. Mail: emanuel@nanoq.gl