Piniarsinnaanermut allagartavit pisavit nalunaarutigineratigut nutarternissaani eqqaamajuk

Aalisarnermut, Piniarnermut Nunalerinermullu Naalakkersuisoqarfimmi (APNN) piniarsinnaanermut allagartanik tunniussisarnermi killiffik ukiup nutaap aallartinngitsiarnerani ukiumoortumik immersugassat tiguneqarsimasut tamarmik qarasaasiamut immiunneqareerput. Pisat pillugit ukiumoortumik immersugassamik immersuinerup nassatarisarpaa ukiumut aggersumut namminerisamik piniarsinnaanermut allagartap nutarterneqarnera.

Maannakkorpiaq sunngiffimmi piniarsinnaanermut allagartanit atuuttunit tamanit 46 %-it immiunneqareerput aamma inuussutissarsiutigalugu piniarsinnaanermut allagartanit attuuttunit tamanit 75 %-it, taamatullu inuussutissarsiutigalugu piniarsinnaanermut allagartanik tunniussinerit 1400 missarpiaaniillutik.

Ajuusaarnaraluartumik suli inuppassuit ukiumoortumik immersugassamik nassiussisimanngillat sunngiffimmi piniarsinnaanermut allagartat 2.000-it missaanniittut aamma inuussutissarsiutigalugu piniarsinnaanermut allagartat 500-it. Tassa imaappoq inuit amerlangaatsiartut, piniarsinnaanermut allagartaminnik nassiuffigineqassanngillat ukiumoortumik immersugassaataat APNN-imi pissarsiarineqarsimatinnagit imaluunniit imminut sullissivimmi www.sullissivik.gl-imi immiussimatinnagit.

APNN-imit suli amigaatigineqarput Kommune Kujallermi illoqarfimmit ataatsimit PIN-imi allattorsimaffiit (inuussutissarsiutigalugu piniartut pillugit allattorsimaffik, aqutsiveqarfinni tamani pigineqartoq) pissarsiarinissaa, tassa imaappoq aqutsiveqarfimmit tassannga piniartut ukioq nutaaq aallartitsinnagu inuussutissarsiutigalugu piniarsinnaanermut allagartaminnik pissarsisinnaassanngillat. Aqutsiveqarfimmi tassani piniartut inuussutissarsiutigalugu piniarsinnaanermut allagartaasa atuuffiat qaammammik ataatsimik januar 2016-ip naanissaata tungaanut sivitsorneqassaaq, allaffissornikkummi sulianik sullissinerup inuussutissarsiumminnik taakua ingerlatsinerat ajorseriartinneqassanngimmat.

Ukiumut kingullermut assersuusiullugu aqutsiveqarfinni amerlanerpaani nutarterinerit amerlassusiat nalinginnaasumik pitsanngoriarsimasutut isikkoqarpoq.

Paasissutissat sukumiinerusut pillugit attavigiuk: Immikkoortortami pisortaq Amalie Jessen, oqarasuaat: 34 53 04, email: amalie@nanoq.gl