Carl Egedep aningaasaateqarfianit qulit nersorneqarput

Stemningsbillede

Nersornaatit Carl Egedep aningaasaateqarfianit Aalisarnermut, Piniarnermut Nunalerinermullu Naalakkersuisoq aamma KNAPK siulittaasua sinnerlugu, kommunip allaffiini nunaqarfiulluunniit allaffiini ullukinnermi, decembarip 21-anni tunniunneqarput.

Allagartamik 5.000 koruuninik aningaasartalimmik nersornaaserneqarput.

Uku nersornaaserneqarput:

  • Julie Egede, Nuuk (ajunaarsimasut kinguaavinut imm. naapertorlugu)
  • Jakob Møller, Qeqertarsuatsiaat
  • Inuuteq Motzfeldt, Qassimiut
  • AAPP, Aappilattumi Aalisartut Piniartullu Peqatigiiffiat, Upernavik (Aalisartut piniartullu toqukkut peerussimasut eqqaassusernissaannut)
  • Ujuuaraq Kaspersen, Ikerasak
  • Simon Thorleifsen, Kangersuatsiaq
  • Akisooq Jensen, Nuugaatsiaq
  • Oline Filemonsen, Iginniarfik
  • Richardt Inuusugtoq, Ikerasaarsuk
  • Nuka-Sinnii Ugpernanngitsoq, Ikerasaarsuk, Nuummi maannakkut najugalik

Aalisartut piniartullu peqatigiiffii nersornaaserneqartussanik kommunalbestyrelsinut innersuussaqartarput, kommunalbestyrelsit innersuunneqarsimasut akuerisarpaat aningaasaateqarfimmullu ingerlatitseqqittarluni.

Aningaasaateqarfiup siunertaraa ikiorsiisarneq inunnut Kalaallit Nunaanni najugaqartunut tassaniluunniit najugaqarsimasunut ukuusunut:

  1. Aalisartut piniartullu ajunaarsimasut kinguaavinut,
  2. aalisartut piniartullu inuutissarsiornermi maligassiuisunut,
  3. aalisartunut piniartunullu utoqqanngortunut,
  4. aalisartunut piniartunullu inuutissarsiorlutik ajoqusertunut,
  5. aalisartutut piniartutullu inuutissarsiornermi maligassiuisuusimasut toqusut eqqaassutissaannut,
  6. immikkut pissutissaqartillugu aalisartut piniartullu, pingaartumik inuusuttut, aningaasaateqarfiup siulersuisuisa isumaat malillugu ikiorserneqarsinnaapput.

Carl Egedep Aningaasaateqarfiata siulersuisui, tassaasut Aalisarnermut, Piniarnermut Nunalerinermullu Naalakkersuisoq aamma KNAPK-p siulittaasua, decembarip 15-ianni 2015-imi ataatsimiinnerminni aalisartut piniartullu utoqqalisut aammalu aalisartutut inuutissarsiornermi maligassiuisutut nersorneqartussatut innersuunneqartut aalajangersaaffigivaat.



Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfiup pisortaanut allatsi, Gerda Knudsen. Mail: gekn@nanoq.gl