Augo Lyngemut Eqqaaniutitut aningaasaateqarfianit savaatillit nersorneqarput

Savaateqarfik

Augo Lyngemut Eqqaaniutitut aningaasaateqarfianit ukioq manna nersornaaserneqartut tassaapput aappariit Henrik Knudsen aamma Elna Jensen, Sillisit Qassiarsuk, Narsaq.

Nersornaaserneqartut allagartamik 5.000 koruuninik aningaasartalimmik tunineqarput.

Nersornaat Aalisarnermut, Piniarnermut Nunalerinermullu Naalakkersuisoq sinnerlugu, sumiiffinni aalisartut, piniartut aamma savaatillit peqatigiiffii suleqatigalugit, kommunip allaffiini nunaqarfiulluunniit allaffiini ullukinnermi, decembarip 21-anni tunniunneqartarpoq.

Nersornaaserneqartut sumiiffinni aalisartut, piniartut savaatillillu peqatigiiffiinit SPS, nersornaaserneqartussatut innersuunneqartarput.

Savaatillit Peqatigiiffiit Suleqatigiissut innersuussutaat kommunalbestyrelsimit akuerineqartarput, innersuussutigineqartut Augo Lyngemut Eqqaaniutitut aningaasaateqarfiani siulersuisunut kingorna ingerlateqqinneqartarlutik.

Aningaasaateqarfiup siunertaraa inuusuttut Kalaallit Nunanni najugaqavissut aalisarnermik, piniarnermik savaateqarnermillu inuutissarsiuteqarnerup tungaatigut soqutiginninnermikkut, eqiasuissutsimikkut eqeersimaarnermikkullu immikkut malunnaateqarsimasunut nersornaasitsisarnissaq imaluunniit akissarsisitsisarnissaq.

Aningaasaateqarfiup siulersuisui, tassaasut Aalisarnermut, Piniarnermut Nunalerinermullu Naalakkersuisoq, Karl-Kristian Kruse, KNAPK-p siulittaasua Henrik Sandgreen, decembarip 15-ianni 2015-imi ataatsimiinnerminni aalajangerpaat savaatilik pineqartoq tassaassasoq Augo Lyngemut Eqqaaniutitut aningaasaateqarfianit ukioq manna nersornaaserneqassasoq.

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfiup pisortaata allattaa, Gerda Knudsen. Mail: gekn@nanoq.gl