Qitiusumik ataatsimiititaliaq pilersinneqarpoq

Piffissami 2015-2019 Meeqqat pillugit Paasisimasalittut Qitiusumik Ataatsimiititaliaq pilersinneqarpoq

Piffissami 2015-2019 Meeqqat pillugit Paasisimasalittut Qitiusumik Ataatsimiititaliaq Naalakkersuisut pilersippaat.

Ataatsimiititaliaq inatsisilerituumik, tarnip pissussaanik ilisimasalimmik, inunnik isumaginninnermi siunnersortimik, ilinniartitsisumik peqqissaasumillu inuttalerlugu katitigaavoq. Meeqqat inuusuttullu pillugit immikkut ilisimasaqarnissaq piumasaqataavoq.

Meeqqap ulloq unnuarlu paaqqinnittarfimmiit inuussutissarsiutigalugulu angajoqqaarsianiit angerlartinneqarnissaanut tunngatillugu oqaaseqaammik tunniussinissaq Meeqqat pillugit Paasisimasalittut Qitiusumik Ataatsimiititaliap suliassarivaa.

Meeqqat pillugit Paasisimasalittut Qitiusumik Ataatsimiititaliaq nutaaq inunnik isumaginninnermi siunnersortimik Sara Abelsen, ulloq 16. december 2015 ataatsimiititaliap inissititerluni ataatsimiinnerani siulittaasutut qinigaasumik, inuttaqarpoq. Aamattaaq isumaginninnermi perorsaasumik Heidi Trondheim, tarnip pissusaanik ilisimasalimmik Camilla Petersen, inatsisilerituumik Jesper Muller, ilinniartitsisumik Janne Kleist Lyberth peqqissaasumillu Dina Berthelsen-imik ataatsimiititaliaq inuttaqarpoq. Ilaasortat sisamat qinigaaqqipput.

“Meeqqat pillugit Paasisimasalittut Qitiusumik Ataatsimiititaliaq annertuumik suliamut ilisimasaqarluni sulivoq meeqqanullu ataasiakkaanut pingaarutilittut inissisimalluni”, ataatsimiititaliap pilersinneqarneranut atatillugu Ilaqutariinnermut, Naligiissitaanermut Isumaginninnermullu Naalakkersuisoq Martha Lund Olsen oqarpoq.

Paasissutissanik annertunerusunik pissarserusukkuit Martha Lund Olsen attavigiuk naalakkersuisup allattaa Sina Møller Kristiansen oqarasuaat 53 93 71 aqqutigalugu.