Ilaqutariit pissakinnerusut juullikkunni aaqqissuussinissaminnut ikiorserneqartussanngortut

Ukiut siulii assigalugit Ilaqutariinnermut, Naligiissitaanermut Isumaginninnermullu Naalakkersuisoqarfik ukioq manna ilaqutariinnut pissakinnerusunut juullikkunni aaqqissuussinissanut ikiorsiiniarpoq.

Ilaqutariinnut pissakinnerusunut tunngatillugu juullikkunni aaqqissuussinissanut kommunit tamarmiusut aningaasanik qinnuteqarsimapput tapiiffigineqarlutillu.

Illoqarfiit nunaqarfiillu arlallit aningaasanik tapiiffigineqarsimapput – tunumi Tasiilamiit Ittoqqortoormiunut, kitaani Aasianniit Maniitsumut, avannaani Qaanaamiit Upernavimmut kujataanut Nanortalimmut, soorluttaaq nunatsinni nunaqarfiit tamarmik aningaasanik tapiiffigineqartut.

2015-imi juullikkunni aaqqissuussinissamut aningaasat 365.000 kr. missaat tapiissutigineqarput.

Aningaasat juullikkunni aaqqissuussinissanut assigiinngitsorpassuarnut atorneqartussaapput. Assersuutigalugu Qaanaami ilaqutariinnut 30-35-inut puussiarsuit nerisassanik qerisunik imallit tunniussuunneqassapput, Qeqertarsuarmilu meeqqanut 270 missaaniittunut juullikkunni sammisaqartinneqassapput. Juullikkunni aaqqissuussinerit assigiissutigaat ilaqutariinnut pissakinnerusunut tamarmik tunngatinneqarmata.

Ilaqutariinnermut, Naligiissitaanermut Isumaginninnermullu Naalakkersuisoq, Martha Lund Olsen, oqarpoq: ”Juulli tamatsinnut isumaqartorujussuuvoq. Taamaattumik nuannaarutigaara inunnut pisariaqartitsinerusunut nunarput tamakkerlugu juullikkunni aaqqissuussinissanut assigiinngitsunut ukioq maannattaaq ikiorsiisinnaagatta. Tamanna kissalaartumik tapersiineruvoq.”

Paasissutissat annertunerusut immikkoortortaqarfimmi pisortaq Ellen Magnussen oqarasuaat 34 66 20 aqqutigalugu saaffiginninnikkut pissarsiarineqarsinnaapput.