Tusagassiuutinik pilersitsinermut inerisaanermullu suliniummut tapiissuteqarneq

Tapiissuteqartarnermut ataatsimiititaliap pilersinneqaqqammersup 11. december 2015 ataatsimeeqqaarnerminni tusagassiuutinik pilersitsinermut inerisaanermullu tapiissutinut qinnuteqaatit tiguneqarsimasut suliarisimavaat.

Qinnuteqaammik ataasiinnarmik Qeqqa.gl, Aviaq Mørch aamma Mads Nordlundimik ingerlanneqartumit qinnuteqarfissap oktobarip 31-iani naanerani taamaallaat tigusaqarsimapput. Suliniut taanna tapiissuteqartarnermut ataatsimiititaliamit tapiissuteqarfigineqarpoq.

Qinnuteqartut tusagassiuutinut tapiissutinut sumulluunniit attuumassuteqanngitsumik internetsikkut nutaarsiassanik aamma ullutsinni oqallisaasunik nutaarsiassiisarnissamut paasissutissiisarnissamullu taperneqarnissamut qinnuteqarput.

Qinnuteqartut qinnutigisaminnik 306.705,- koruuninik taperneqarput.

Tapiissuteqartarnermut ataatsimiititaliaq aamma Naalakkersuisut amerlanerusut qinnuteqassasut kissaatigisimagaluarpaat taamaalillutik Aningaasanut Inatsimmi aningaasaliissutit siunertarineqartumut atorneqarniassammata.

Paasissutissanik allanik pissarserusukkuit Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfimmi, immikkoortortaqarfimmi pisortaq Karl Davidsen, email: kdav@nanoq.gl oqa.: + 299 34 50 00