2015-2018-imut Meeqqat pillugit Siunnersuisoqatigiit nutaat

Piffissami 2015-2018 Meeqqat pillugit Siunnersuisoqatigiit nutaat Naalakkersuisunit pilersinneqarput.

Piffissami 2015-2018 Meeqqat pillugit Siunnersuisoqatigiit ilaasortai nutaat peqatigiiffinniit kattuffinniillu assigiinngitsunit innersuussisinnaatitaasunit innersuunneqarnikuupput.

Meeqqat pillugit apeqqutinut sunulluunniit Meeqqat Illersuisuannut siunnersuinissaq aqqutissiuussinissarlu Meeqqat pillugit Siunnersuisoqatigiit suliassarivaat.

Meeqqat pillugit Siunnersuisoqatigiit nutaat ukkuninnga inuttaqarpoq meeqqat nakorsaat Inga Hjuler, tarnip pissusiinik ilisimasalik Connie Gregersen, perorsaasoq Anda Poulsen, inatsisileritooq Morten Nornild, inunnik isumaginninnermi siunnersorti Sara Gudrun Abelsen aamma ilinniartitsisoq William Kriegel.

Ilaatigut meeqqat alliartornerat ineriartornerallu, meeqqat atuarnerat, meeqqat kulturiat sunngiffimmilu inuunerat, meeqqat peqqissusaat, meeqqat inatsisitigut inissisimanerat meeqqallu immikkut pisariaqartitallit siammasissumik ilisimasaqarfiginissaat siunertaralugu Meeqqat pillugit Siunnersuisoqatigiit taamatut katitigaapput.

Aviâja Egede Lynge april 2015-imili Meeqqat Illersuisuattut atorfeqarpoq taavalu Meeqqat pillugit Siunnersuisoqatigiinni pilersinneqaqqammisumi siulittaasuulluni.
“Meeqqat atugassarititaat Naalakkersuisunit pingaartinneqarpoq. Suliami uani assigiinngitsutigut meeqqat atugaat pillugit eqqumaffiginninnissamut Meeqqat pillugit Siunnersuisoqatigiit pingaarutilimmik inissisimapput.” Ilaqutariinnermut, Naligiissitaanermut Isumaginninnermullu Naalakkersuisoq Martha Lund Olsen oqarpoq.

Meeqqat pillugit Siunnersuisoqatigiit minnerpaamik ukiumut sisamariarlutik ataatsimiittarput.

Paasissutissanik allanik pissarserusukkuit Martha Lund Olsen attavigiuk naalakkersuisup allattaa Sina Møller Kristiansen oqarasuaat 53 93 71 aqqutigalugu.