Naalagaaffeqatigiit ataatsimiinnerat 2015

Ministeriuneq Lars Løkke Rasmussen, Lagmand Aksel V. Johannesen aamma Naalakkersuisut Siulittaasuat Kim Kielsen ullumi 14. december 2015 ukiumoortumik naalagaaffeqatigiit ataatsimiinneranni naapeqatigiipput, taannalu ukioq manna Ministeriunerit najugaqarfigisartagaanni Marienborg-imi ingerlanneqarpoq.

Naalakkersuisut Siulittaasuata, Ministeriunerup aamma Lagmandip apeqqutit sammisassallu ataatsimoorussat Naalagaaffeqatigiinnermut pingaaruteqartut oqaloqatigiissutigaat.

Kim Kielsen ataatsimeereernermi oqarpoq:

”Ukiumoortumik naalagaaffeqatigiit ataatsimiittarneri Naalagaaffeqatigiinnerup iluani ataqatigiinnermut pingaaruteqarput. Tassani unammilligassat piffissap ingerlanerani pilersartut qanoq iluarsiivigissanerlutigu, aamma akornatsinni suleqatigiinnerput qanoq nukittorsassanerlutigu, oqaluuserisarpagut.

Ukioq manna naalagaaffeqatigiit ataatsimiinneranni nunani tamalaani aalisarnermut ingerlatsivinni aqutsinermut kattuffinni suleqatigiinneq oqallisigaarput, tassani ”Danmarki Savalimmiut aamma Kalaallit Nunaat sinnerlugit”, ulluinnarni taaneqartartoq DFG-imut ilusiliaq, Kalaallit Nunaat aamma Savalimmiut sinnerlugit peqataalluni, naalagaaffiit ilaasortaasut ataasiakkaat taasisoqartussanngoraangat tamarmik immikkut ataasiinnarmik taasisinnaallutik. Kalaallit Nunaat aamma Savalimmiut tamarmik immikkut aalisarnermut politikkeqarlutik, marluullutik immikkoorlutik, aalisarnermik nunatut ingerlatsisuupput, tassani soorunami soqutigisat assigiinngissuteqartut pilersinnaasarlutik. Ataatsimoorluta isumaqatigiippugut taakkununnga atatillugu oqaloqatigiittarnerit suleqatigiinnerlu nukittorsarneqassasut.

Aamma Savalimmiut aammalu Kalaallit Nunaata nunatut naalakkersuinikkut aaqqissuussinermik suliaqarnerannut tunngatillugu neriulluarnartumik oqaloqatigiippugut, Ministeriuneq suliaqarnermi tassani kissaatigineqassappat ikiuunnissamik neqerooruteqarluni.”

Naalagaaffeqatigiit ataatsimiinnerat ukioq manna Kalaallit Nunaanni ingerlanneqartussaasimagaluartoq, danskit aamma Savalimmiormiut qinersinerat pissutigalugu kinguartinneqarsimavoq. Taamaattoq suleqataasut ukiumoortumik naalagaaffeqatigiit ataatsimiittarnerat pillugu tunngaviusup attatiinnarnissaa kissaatigisimavaat, Ministeriuneq tikeraartitsisuutillugu naalagaaffeqatigiit ataatsimiinnerat ingerlatissallugu isumaqatigiissimallutik. 2016-imi Naalagaaffeqatigiit ataatsimiinnissaat Kalaallit Nunaanni ingerlanneqassaaq.

Annertunerusumik paasisaqarusunnermi attaveqarfissat: Naalakkersuisup allattaa Karen A. Motzfeldt, tlf. +299 562450