Silap pissusaa pillugu isumaqatigiissut nunap inoqqaavinut pakatsinartoq

FN-imi silap pissusaanut isumaqatigiissut Kyoto-mi isumaqatigiissummut taartaasussaq, Paris-imi unnuk manna inaarutaasumik akuerineqarpoq. Isumaqatiginninniarnerit ajornakusoortorujussuit maannakkut naammassineqarput.

Naalakkersuisut isumaqatiginninniarnerit ingerlaneranni, FN-imi Nunap Inoqqaavisa Pisinnaatitaaffii pillugit Nalunaarut tunngavigalugu, silap pissusaanut isumaqatigiissummi nunap inoqqaavinut aammalu nunap inoqqaavisa ineriartortitsinissamut pisinnaatitaaffeqarnerannut innersuussutit pisussaaffiliisut ilanngutsinniarnissaat sulissutigaat. FN-imi silap pissusaanut isumaqatigiissut nutaaq, maannakkut naammassillugu isumaqatiginninniutigineqareersoq, nunap inoqqaavisa pisinnaatitaaffiinut imaluunniit nunap inoqqaavisa ineriartortitsinissamut pisinnaatitaaffeqarnerannut innersuussutinik pisussaaffiliisunik imaqanngilaq. Isumaqatigiissut taamaallaat aallaqqaasiinermi pisussaaffiliinngitsumi nunap inoqqaavinut innersuussuteqarpoq aammalu nunap inoqqaavisa silap pissusaata allanngoriartorneranut naleqqussarnissamik ilisimanninnerat akuersaarneqarluni.

Naalakkersuisunut ilaasortaq Aningaasaqarnermut, Aatsitassanut Nunanullu Allanut akisussaasuusoq oqarpoq:

”Nunap inoqqaavisa nunaat aamma nunat akisussaaffeqarfigisaat silap pissusaata allanngoriartornerata sunniutaannik takutitsinissamut amerlanertigut atorneqarput, tassani ilaavoq Issittoq. Nunap inoqqaavi silap pissusaata allangoriartorneranut ajoqusiisumut, ullumikkut nunarsuaq tamakkerlugu sunniisumut, annikitsuaraannarmik sunniuteqarsimapput. Taamaakkaluartoq silap pissusaanut isumaqatigiissummi atsioqataasut nunap inoqqaavisa pisinnaatitaaffii immikkuullarissut, ilaatigut FN-imi Nunap Inoqqaavisa Pisinnaatitaaffii pillugit Nalunaarummi akuerineqarsimasut, ataqqisinnaasimanngilaat. Tamanna annertuumik pakatsinarpoq.

Nunap inoqqaavi immikkuullarissunik pisinnaatitaaffeqartut, ilanngullugu ineriartortitsinissamut pisinnaatitaaffeqartut, FN-imi Nunap Inoqqaavisa Pisinnaatitaaffii pillugit Nalunaarummi oqariartuutigineqartoq, inuiaqatigiit nunanit tamalaaneersut isumaqatigiissutip oqaasertaanni uppernarsarsimasariaqaraluarpaat.”

Vittus Qujaukitsoq sapaatip akunnerani kingullermi silap pissusaanut isumaqatiginninniarnernut atatillugu Kalaallit Nunaanni silap pissusaata annertoorujussuarmik allanngoriartornera tamatumalu sunniutai pillugit arlaleriarluni oqalugiarpoq.

Silap pissusaanut isumaqatiginninniarnerit nalaanni Naalakkersuisut, Namminersorlutik Oqartussat aamma danskit naalakkersuisuisa akornanni suleqatigiinnissamut isumaqatigiissummut naapertuuttumik, Kunngeqarfik Danmarkip isumaqatiginninniarnernut peqataatitaasa ataatsimoortut ilaattut peqataapput. 

Annertunerusuni paasisaqarusunnermi attaveqarfissq: Nunanut allanut pisortaqarfimmi immikkut siunnersorti Pernille Bengtsen +299 55 33 27 / +45 60 62 31 24