Nunap inuiisa pisinnaatitaaffii salliutinniarneqarput

Nunap inuiisa pisinnaatitaaffii Nunarsuarmioqatigiit FN-ip inuit pisinnaatitaaffiinut ullorititami silap pissusaanik isumaqatiginninniarnermi salliutinniarneqarput

10. december 1948 pillugu eqqaaniutitut Nunarsuarmioqatigiit FN-ip inuit pisinnaatitaaffiinut ullorititaq nalliussineqarnerani nunani tamalaani inuiaqatigiinni nunap inuiisa pisinnaatitaaffii suli pituttugaasumik akuerisaalersimanngillat.

Sisamanngornermi unnukkut kingusissukkut Frankrigimi Nunanut allanut Ministerip Laurent Fabiusip silap pissusaanut isumaqatigiissummut missingiut nutaaq saqqummiuppaa. Isumaqatigiissutissamut missingiutip siunertarisassatut paragraffini nunap inuiisa pisinnaatitaaffiinut pituttuisunik innersuussissutinik imaqanngilaq. Isumaqatigiissutit siuliini silap pissusaanut isumaqatigiissummut missingiutip siunertaata nunap inuiisa pisinnaatitaaffiinik mianerinninnissaq ilanngunneqaraluarpoq.

”Isumaqatigiissummut missingiummi kingullermi Parisimi oqaluuserineqartoq naammaginartumik nunap inuiisa pisinnaatitaaffii mianerineqanngillat, naak Nunarsuarmioqatigiinni naalagaaffiit ilaasortat siusinnerusukkut 2008-mi Nunap Inuiisa Pisinnaatitaaffii pillugit Nalunaarummi akuerereeraluaraat.

Nunap inuiisa silap pissusaata allanngoriartornerinit assigiinngisitaartumik sunniivigineqarput, maannakkullu naalagaaffiit silap pissusaa pillugu isumaqatigiissummik isumaqatiginninniartuusunut sanilliullugit gassinik silaannarmik kissatsikkiartortitsisunik annertuallaamik aniatinneqartunut tunngatillugu akisussaaffeqartinneqarsinnaanatik.

Silap pissusaa pillugu isumaqatigiissut naapertuulluartoq anguneqassappat aallarniummi Artikel 2-milu pisinnaatitaaffiit immikkut ittut 2008-miilli Nunarsuarmioqatigiinni naalagaaffiit ilaasortat isumaqatigiissutigisimasaat ilaasariaqarput.

FN-ip inuit pisinnaatitaaffiinik nalunaarutaata atuutilertinneqarneraniit ukiut 67-it qaangiunneranni Parisimi sapaatip akunnerani matumani nunap inuiisa pisinnaatitaaffii nunat tamalaat silap pisussaa pillugu isumaqatigiissummi pisussaaffiliisumik ilanngullugit akuersissutaasariaqarnerat piffissanngorpoq,” Naalakkersuisoq Vittus Qujaukitsoq oqarpoq.

Isumaqatigiinniarnerit angusaqarnissap tungaanut tallimanngornerup unnukkuanut  ingerlassasut neriuutigineqarpoq. Tamatuma kingorna Frankrigip suisoqarfiup isumaqatigiissutissatut inaarutaasumut missingiut saqqummiutissagaa naatsorsuutigineqarpoq, taannalu FN-imi naalagaaffiit ilaasortat akornanni tamanit isumaqataaffigineqarnissaa neriuutigineqarpoq.


Paasisaqarnerorusuttut attavigisinnaavaat Nunanut Allanut Pisortaqarfimmi immikkut siunnersorti Pernille Bengtsen, oqarasuaat +299 55 33 27 / +45 60 62 31 24.