Ineriartortitsisinnaatitaaneq ilungersuutigaa

Silap pissusaa pillugu isumaqatigiissummi nutaami ineriartornermut pisinnaatitaaffeqarnissaq aamma nunap inoqqaavisa pisinnaatitaaffii pillugit Kalaallit Nunaat ilungersuuteqartoq

Nunarsuarmioqatigiit FN-ip silap pissusaa pillugu isumaqatiginninniarnerinik siulersuisoq Frankrigimi Nunanut allanut Ministeri Laurent Fabius pingasunngormat nal. 15 silap pissusaa pillugu isumasaqatigiissummut nutaamut allaqqitassiamik tamakkiisumik saqqummiussaqarpoq. Manna tikillugu oqaasertaasimasunik, ulluni kingullerni isumaqatiginninniarnernik, kiisalu suleqatigiissitaliani isumaqatiginninniarnernik siulersuisimasunit ministerinit ilanngussuinernik allaqqitassiaq tunngaveqarpoq.

Allaqqitassiaq naannerugaluartoq suli sammisanik isumaqatigiissutigineqarsimanngitsunik imaqarpoq. Ilaatigut pingaarnerpaat, ilaalluni ”assigiinngisitaarneq”, nunat pisuut piitsullu akornanni pisussaaffiit qanoq agguataarnissaannut tunngasoq, aamma ”aningaasaliisarneq” – nunat pisuut silap pissusaanut tunngassuteqartumik ineriartortitsinermi ikiorsiissutit annertusinissaannut qanoq pisussaaffilertiginissaat, tassaallutik nunat siuarsarniakkat isumaqatigiissummik tamakkiisumik akuersissuteqarnissaannut aalajangiisut.

Allassimasassamut allaqqitassiami nutaami nunat inoqqaavinut, inuit pisinnaatitaaffiinut aamma assigiinngisitaarnermut innersuussutit pingaarutillit kimeerussarneqarsimaneri Kalaallit Nunaata malugaa isumakuluutigalugulu.

”Allaqqitassiami nutaami nunap inoqqaavinut innersuussutit kimeerussarneqarsimanerat Kalaallit Nunaata isornartorsiorsimavaa, tamannami nunap inoqqaavisa inuunermi atugarisaannut periarfissaannullu annertuunik kinguneqarsinnaammata”, Naalakkersuisoq Vittus Qujaukitsoq oqarpoq, nangillunilu: 

”Ilanngullugu isumaqatigiissummi piginnaasat assigiinngiiaartut ataasiakkaanullu tunngasut pillugit tunngavigisaata sanngiillisissimanera Kalaallit Nunaata assut iluarinngilaa, tamanna ineriartornissamut pisinnaatitaaffimmut – ilanngullugulu aamma Kalaallit Nunaannut – aalajangiisuummat”.

Allagaasup saqqummiunnerata kingorna allaqqitassiap misissoqqissaarnissaanut illuatungeriit sivikitsumik piffissalerneqarput, kingornatigullu allaqqitassiamut illuatungeriit qisuariarsinnaaffianni ataatsimiittoqarluni. Tamanna unnuap qeqqa tikingajallugu ingerlanneqarpoq, kingornatigullu suliassaqarfinni ataasiakkaani suleqatigiissitat oqallinnertik nangippaat.

Isumaqatigiissutissatut allaqqitassiamik iluarsisamik nutaamik isumaqatiginninniarnerinik siulersuisoq sisamanngorpat ualikkut saqqummiutissavaa. Frankrigimit siulersuisoqarfik tallimanngornikkut unnukkut decembarip 11-anni isumaqatigiissut inaarutaasoq anguniagaqarfigaat. Taamaattorli siusinnerusukkut silap pissusaanik isumaqatiginninniarnernit piffissaliussatut aalajangiussat iluini inaarutaasumik isumaqatigiissummik pissarsiaqarnissaq anguneqartarsimanngilaq.

Nunap inoqqaavisa pisinnaatitaaffiinut, kiisalu ineriartornissamut pisinnaatitaanermut innersuussutinik ilanngussaqarnissaq Kalaallit Nunaata ilungersuuteqarnini ingerlatiinnassavaa.

Paasisaqarnerorusuttut attavigisinnaavaat Nunanut Allanut Pisortaqarfimmi immikkut siunenrsorti Pernille Bengtsen oqarasuaat +299 55 33 27 / +45 60 62 31 24.