Business Forum Nuummi

Polen-imiut inuussutissarsiortut angalaqatigiit Business Forum Nuummi ingerlappaat

Ulluni 8. – 10. decembari Polen-imiut atorfillit aamma inuussutissarsiortut angalaqatigiit Nuuk tikeraarpaat. Angalaqatigiit tassaasut Københavnimi Polen-ip sinniisoqarfia, suliffeqarfiit Polen-imeersut arfineq pingasut aamma Polen-imiut paasissutissiisarnermut aningaasaliisarnermullu kattuffiat - Polish Information and Foreign Investment Agency -”Go Arctic”-imi pisussanut pilersaarutip, Kalaallit Nunaata aamma Polen-ip akornanni inuussutissarsiornermi suleqatigiinnerup ineriartortinneqarnissaanik aqqutissiuussinissamik siunertaqartup, pilersinneqaqqammersup ilaatut Nuummiipput.

Ullumi Business Forum-imi, Nunanut Allanut Pisortaqarfik suleqatigalugu aaqqissorneqartumi, Polen-imiut aamma kalaallit inuussutissarsiortunit aallartitat suliffeqarfiutiminnik saqqummiillutik ilisarititsipput, tamatuma kingorna suliffeqarfiit akornanni niuernermi aningaasaliisarnermilu suleqatigiinnissamut periarfissaqarfiusut pillugit oqallittoqarluni, pingaartumik nutaaliorluni suliffissuaqarnermi teknologiimilu nukissianut aaqqiissutissat iluanni.

Polen-imiut angalaqatigiit aamma tikeraarnermik nalaanni atorfillit Inuussutissarsiornermut, Suliffeqarnermut Niuernermullu Naalakkersuisoqarfimmeersut; Aalisarnermut, Piniarnermut Nunalerinermullu Naalakkersuisoqarfimmeersut; Pinngortitamut, Avatangiisinut Inatsisinillu Atuutsitsinermut Naalakkersuisoqarfimmeersut; Aatsitassanut Ikummatissanullu Naalakkersuisoqarfimmeersut kiisalu Nunanut Allanut Pisortaqarfimmeersut ataatsimeeqatigaat.

Polen-imiut inuussutissarsiortut aamma Polen-ip sinniisoqarfiata malitseqartitsilluni tikeraarnissaat 2016-imi upernaakkut pilersaarutigineqarpoq.




Annertunerusumik paasisaqarusunnermi attaveqarfigineqassaaq Nunanut Allanut Pisortaqarfimmi AC-fuldmægtigi Rebecca Lynge oqarasuaammut: +299 55 33 28 / rejl@nanoq.gl