Suliffeqarfinnik nutaanik aallarnisaaneq

Nordiske flag

Nunat akimorlugit ilinniarnerup isumassarsiornerullu nukittorsarsinnaallugillu suliassaqarfimmi ataatsimoorussatut nunat avannarlerni pilersitanik aallartisaasinnaanerit nunat avannarliit qanoq suleqatigiissinnaanerat Nordisk Ministerrådip 7. december 2015-imi ataatsimiinnerani Randi Vestergaard Evaldsenip nunat avannarlernilu inuussutissarsiornermut ministerit sinnerisa oqaluuserisimavaat.

Nunat avannarlerni suliffiit akornanni suleqatigiinnermik suliniutit aallartisarnerinik nunat avannarlerni aaqqissuussiviup Nordisk Innovationip nukittorsaasinnaanera ataatsimiinnermi ilaatigut oqaluuserineqarpoq.

Nunat Avannarlerni suliffinnik mikisunik akunnattumillu angissusilinnik ataatsimoorullugu nunat avannarlerni inuussutissarsiornermi suliniutit aallartitat Nordisk Innovationip, koruuninik 72 mio.-nik aningaasanik atugaassaateqartup tapiiffigisarlugillu aningaasaliiffigisarpai.

Inuussutissarsiornermut, Suliffeqarnermut Niuernermullu Naalakkersuisoq Randi Vestergaard Evaldsen oqarpoq:

”Nunat avannarlerni nutaaliornermut ingerlassamit nunatsinni suliffeqarfiit iluaqusernissaannut periarfissarujussuit takusinnaavakka. Tassunga atatillugu 2016-imi Nordisk Ministerrådip immikkut sammisaqarfissatut imermut tunngasunik ilaatitaqarnera immikkut soqutiginaateqarpoq. Taamaattumik – ermermut imermullu periusissiap takkuttussap ilaatut – nunatsinnit imermut sermermullu suliniutit nutaat aallartisarnerisa nalaanni Nordisk Innovationip agguaassassaannit tapiiffigineqarsinnaaneri misissorniarpakka.”

Nunat avannarlermiut inuussutissarsiornermut ministeriisa akornanni ataatsimiinnermi sammisat pingaarutillit allat tassaapput Nunat Avannarlerni killeqarfiliussatut aporfissat piiarnissaat. Tassunga atatillugu Nunat Avannarliit sinnerini nunatsinnit inuussutissarsiornermik ilinniakkat akuerisaanissaannik – ilaatigut nunatsinnit sulisartut ilinniakkanik ingerlassaqarnissaannut periarfissanik nukittorsaasinnaaniarluni – pisariaqartitsinerit Randi Vestergaard Evaldsenip saqqummiuppai.

Annertunernik paasisaqarusukkuit naalakkersuisup allattaa Helene S. Pedersen attavigiuk: oqarasuaat angallattagaq 58 61 16.