Nunavut Kalaallit Nunaata ICC-llu ataatsimoorlutik nalunaarutaat

Nunavut Kalaallit Nunaatalu naalakkersuisui Inuit Circumpolar Council peqatigalugit silap pissusaata allanngoriartornera ataatsimoorlutik nalunaaruteqarfigaat

Aningaasaqarnermut, Aatsitassanut Nunanullu Allanut tunngasunut Naalakkersuisoq Vittus Qujaukitsoq ullumi COP21-mut peqataanermini Nunavup naalakkersuisuisa siulittaasuat Peter Taptuna ICC International-illu siulittaasua Okalik Eegeesiak peqatigalugit ataatsimoorussamik nalunaaruteqarput.

Silap pissusaata allanngoriartornerata nunani issittoqarfinniittut inuinut ineriartornissamullu pisinnaatitaaffeqarnerannut immikkut unammillernarsinnaasut nunarsuarmioqatigiinnut ataatsimoortumik oqariartuutigineqarpoq, tassani akuerineqarnissaq tapersersorneqarnissarlu qitiutillugit oqariartuutaallutik.

Oqariartuut ullumikkut USA-mi, Canadami Kalaallillu Nunaanni COP21-qarneranut atatillugu tusagassiutinut saqqummiunneqarpoq.  

Ataatsimoorullugu nalunaarusiap nassiunneqarneranut atatillugu Vittus Qujaukitsoq oqaaseqarpoq:

"Nunarsuarmioqatigiit sila pillugu ilisimatusarnerisa siuarsartuarnissaata qulakkeerneqarnissaa Kalaallit Nunaannit pisussaaffiliivoq akisussaaffiliillunilu annertuumik. Kalaallit Nunaanni silap pissusaata allanngoriartorneranut ilisimatusarneq misissueriaatsinik nutaanerpaanik inuillu annertuumik sunniuteqarfigineqarnerannik ataqatigiisinneqassapput. Nunarsuarmioqatigiit aalajangersaaniarnerminni nunat issittoqarfimmiittut ataatsimoorlutik oqariartuutaat, ilisimastoqqaallu tusaaniarneqartariaqarput ilanngutitinneqarlutillu. Tamanillu pingaarnerpaatinneqassaaq nunani issittoqrfinniittut nunap inuii ineriartornissamut allatulli assigiimmik  pisinnaatitaaffeqassasut qulakkeerneqarnissaat. Nunap inuiisa pisinnaatitaaffii soqutigisaallu inaarutaasumik COP21-mi nalunaarusiassami ilaatinneqassapput.”

Vittus Qujaukitsoq paasisimasallit oqallinneranni ”Arctic Day Panel Session” ullumi ingerlanneqartussami peqataanissaa naatsorsuutigineqarpoq, tassani ilaatigut ICC-ip siulittaasua  Okalik Eegeesiak Samerådillu siulittaasuat Aili Keskitalo taamatullu Nunavut Tunngavik Incorporated (NTI)-ip siuilittaasuat Cathy Towtongie oqallinnermi peqataassapput. Ullup ingerlanerani kingusinnerusukkut Vittus Qujaukitsoq High-Level Event ”Innovative Island Solutions: From the Poles to the Tropics” Global Island Partnership (GLISPA)-mit  Nunat Imarsuup Akianiittut Naalagaaffiillu ilaasa Kattuffiata (OCTA) Kalaallit Nunaata ilaasortaaffigisaata aaqqissugaanik ingerlanneqartussami ammaalluni oqalugiassaaq.

 

Ataatsimoorullugu nalunaarut uani atuaruk.

 

Annertunerusumik paasisaqarniarussi attavigisinnaavarsi: Immikkut siunnersorti Pernille Bengtsen +299 55 33 27 / +45 60 62 31 24