Kalaallit Nunaanni silap pissusaata allanngoriartornera COP21-mi

Kalaallit Nunaanni silap pissusaata allanngoriartornera COP21-mi Vittus Qujaukitsup immikkut sammivaa

Naalakkersuisoq Vittus Qujaukitsoq ataasinngornermi COP21-p nalaani Nunavutimi siuttoq, Peter Taptuna, aammalu ICC Internationalimi siulittaasoq, Okalik Eegeesiak, ataatsimeeqatigai.
 
Ataatsimiinnermi Issittumi silap allanngoriartornera pillugu ataatsimoortutik nalunaaruteqarnissamut allaqqitassiaq eqqartorpaat. Nalunaarummi avammut ataatsimoortumik oqariartuutaassapput, issittumi inuiaqatigiinni aammalu issittumi ineriartornissamut pisussaaffimmut silap pissusaata allanngornerata kingunerisaanik immikkut ittumik unammillernartuusut, miserratigineqannginnissaat aammalu tapersersorneqarnissaat pillugu.

Nalunaarut COP21-p nalaani marlunngornermi tusagassiutinut avammut saqqummiunneqarnissaa naatsorsuutigineqarpoq.

Ataasinngornermi Qujaukitsup Kalaallit Nunaanni silap pissusaata allanngoriartornera eqqartorpai, inuiaqatigiinnilu allannguineq immikkut sammivaa. Inuiaqatigiinni allannguineq pisariaqartuusoq Nunat Avannarliit suleqatigiit Kalaallit Nunaat sammitillugu naqissuserneqarpoq.

Qujaukitsup oqalugiarnermini erseqqissarpaa, Kalaallit Nunaanni piniarneq ukiuni kingullerni annertuumik atugarliorfiusarsimasoq - silallu pissusaata allanngornera tamatumunnga kisimi peqqutaanngilaq – aammali EU-p puisip amianik eqqussinermik inertitsinerat peqqutaaqataavoq.

"Inuiaqatigiit silap pissusaata allanngorneranik sunnerneqarpoq, aammali avataanit sunniisoqarpoq, piniartunut atugarliortitsisumik”.
”Silap pissusaata allanngoriartornera inuunermi atukkanut allannguinera ilutigalugu, Kalaallit Nunaanni aningaasaqarnermut tunngaviusup allanngorluinnarnera aaqqiiviginiartartussaavarput”, Vittus Qujaukitsoq oqarpoq.

Vittus Qujaukitsup oqalugiaataa. 

 

Paasisaqarnerorusuttut attavigiuk: Immikkut Siunnersorti Pernille Bengtsen, oqarasuaat +299 55 33 27 / +45 60 62 31 24